१२ साउन, विराटनगर । विराट नर्सिङहोममा कार्यरत थप चार स्वास्थ्यकर्मीमा कोरोना संक्रमण पुष्टि भएको छ । यसअघि मंगलबार सोही नर्सिङ होमका सञ्चालकसमेत रहेका चिकित्सकमा संक्रमण देखिएको थियो ।
नयाँ संक्रमित सबै जना नर्स रहेको विराटनगर महानगरका जनस्वास्थ्य महाशाखा प्रमुख रमेश कार्कीले जानकारी दिए ।
कोसी अस्पतालमा कार्यरत एक चिकित्सकमा समेत संक्रमण पुष्टि भएको छ । तिनैमध्येकी एक नर्सको कन्ट्याक्ट ट्रेसिङका आधारमा कोसीका चिकित्सक तथा स्वास्थ्यकर्मीको पनि स्वाब संकलन भइरहेको कार्कीले बताए ।
लाइफगार्डका १४, न्युरोका २८ र लीली चिल्ड्रेन अस्पतालका २१ जना र संक्रमितहरूको कन्ट्याक्ट ट्रेसिङका आधारमा गरी सोमबार ९० जनाको स्वाब संकलन गरिएको उनले जानकारी दिए ।
महानगरमा क्वारेिन्टन थप्न र एउटा अस्पताललाई आइसोलेसन वार्ड बनाउन प्रदेश सरकारसँग छलफल भइरहेको उपमेयर इन्दिरा कार्कीले बताइन् ।
प्रदेश १ प्रहरी कार्यालयमा कार्यरत २४ प्रहरीसमेत गरी हालसम्म विराटनगर महानगरमा ६७ जनामा संक्रमण पुष्टि भइसकेको छ ।
