१४ साउन, दोहा ।
नेपाली युवतीलाई ब्ल्याकमेल गरेको आरोपमा नेपाली युवकविरुद्ध कतारको साइबर क्राइममा उजुरी परेको छ ।
नेपाली युवकले विभिन्न युवतीहरुलाई ब्ल्याकमेल गर्ने तथा शारिरिक सम्बन्ध राख्न बाध्य पार्न खोजेको भन्दै साइबर क्राइममा उजुरी दिइएको जनाएको छ ।
मकवानपुरकी उर्मिला थिङ्ग (नाम परिवर्तन) ले उदयपुरका चित्रबहादुर कामी (पूर्वेली कान्छो फेसबुक आइडी प्रयोग गर्दै आएको) विरुद्ध ब्ल्याकमेलको साइबर क्राइममा उजुरी दिएकी हुन् ।
ती युवतीलाई युवकले पटक–पटक फोनमा अपशब्द बोल्ने गरेको, सँगै बस्नका लागि बाध्य पार्ने किसिमको भ्वाइस म्यासेज पठाउने गरेको भन्दै पीडितले मकवानपुर मिलन केन्द्र कतारका संरक्षक सरोज पुडासैनी मार्फत निवेदन दिएकी थिइन् ।
पुडासैनीले सो निवेदन इमेलमार्फत् कतार साइबर क्राइमसम्म पुगेको हो । कामीले सामाजिक सन्जाल फेसबुक र टिकटकमा थिङ्गको तस्वीर राखेर आपत्तिजनक स्ट्याटस लेखेर चरित्रहत्या गर्न खोजेको पीडित युवतीले गुनासो गरेकी छिन् ।
कतारमा रहेको एक क्लिनिङ्ग कम्पनीमा थिङ्ग करिव दुई वर्ष अघि रोजगारीका लागि आएकी थिइन् । कामीसँग सामान्य चिनजान पश्चात साथी भएकी थिङ्ग तीन बच्चाकी आमा हुन् । पीडितले कतारस्थित नेपाली दूतावासमा पनि आफ्नो समस्या राखेकी छिन् ।
