२१ साउन, वीरगञ्ज ।
वीरगञ्ज कारागारमा बुधबार थप २९ जनामा कोरोना संक्रमण पुष्टि भएको छ । कारागार कार्यालयका प्रमुख श्रवण पोखरेलसहित २९ जनामा कोरोना देखिएको वीरगञ्ज कारागार कार्यालयले जानकारी दिएको छ ।
साउन १८ गते संक्रमित भेटिएकाहरुसँगको सम्पर्क भएका १ सय १८ जनाको स्वाब परीक्षण गर्दा २९ जनामा संक्रमण पुष्टि भएको हो । कार्यालय प्रमुखसहित २ जना कर्मचारी, ३ जना नेपाली सेना र २४ जना कैदीबन्दीमा कोरोना संक्रमण पुष्टि भएको छ ।
कार्यालय प्रमुख पोखरेलले भने, ‘कन्ट्याक्ट ट्रेसिङका क्रममा स्वाबको नमुना दिएका थियौं मसहित २९ जनाको रिपोर्ट पोजेटिभ आएको छ । आफू आइसोलेसनमा बस्नुका साथै कारागारका कैदीबन्दीलाई पनि आइसोलेसनमा राख्न प्रबन्ध मिलाउँदैछु ।’
वीरगञ्ज कारागारमा १ हजार २ सय ५० जना भन्दा बढी कैदीबन्दी छन् । यसअघि २२ वटा स्वाब नमुना परीक्षण गर्दा १३ जनामा कोरोना संक्रमण पुष्टि भएको थियो । १ महिला कैदीसहित ८ जना कैदीबन्दी, नेपाल प्रहरी तर्फका ३ जना सुरक्षाकर्मी र २ जना कर्मचारीमा कोरोना संक्रमण पुष्टि भएको हो ।
कारागार परिसरमा कैदी र कर्मचारीका लागि बेग्ला बेग्लै आइसोलेसन कक्षमा राखिएको छ । स्वास्थ्यकर्मीबाट नियमित निगरानी र उपचार चलिरहेको छ । १ जना महिला बन्दीका लागि भने कारागारभित्र नै अलग कक्षको ब्यवस्था गरिएको छ ।
