२२ साउन, नयाँ दिल्ली ।
पश्चिमी भारतीय शहर अहमदाबादको एक अस्पतालको सीसीयूमा आगलागी हुँदा ८ जना बिरामीको मृत्यु भएको छ ।
एक जना स्वास्थ्यकर्मीको पीपीइमा ‘शर्ट सर्किट’पछि आगो समातेपछि सघन कक्षमा आगलागि भएको बीबीसीले जनाएको छ । घटना बिहीबार बिहान तीन बजे भएको जनाईएको छ ।
वरिष्ठ अग्नी नियन्त्रक राजेश भट्टले भने–“पीपीइमा आगलागी भएपछि त्रसित स्वास्थ्यकर्मी सघन कक्षमा दौड्न थाले, परिणामस्वरुप सघन कक्षभरि आगलागी हुन पुग्यो ।”
करिब एक घण्टाको प्रयासपछि आगो नियन्त्रणमा आएको उनले बताए । भट्टका अनुसार अस्पतालमा भर्ना भएका ४० जनलाई बिरामीलाई अन्यत्र सारिएको छ ।
अहमदाबाद प्रहरीले अस्पतालका निर्देशकलाई नियन्त्रणमा लिएर सोधपूछ जारी राखेको छ । अग्नी नियन्त्रकहरू कोभिड–१९ बिरामीको सम्पर्कमा आएकोले क्वारेन्टिनमा बस्नुपर्ने भएको छ ।
घटनाप्रति भारतीय प्रधानमन्त्री नरेन्द्र मोदीले दुःख व्यक्त गरेका छन् ।
