२२ साउन, एजेन्सी । बार्सिलोनाका कप्तान लिओनेल मेस्सीले अबको ४ वर्षभित्र बार्सिलोनाबाट नै सन्यास लिने क्लबका अध्यक्ष जोसेप मारिया बार्टोमेउले बताएका छन् ।
पछिल्लो समय क्लबसँग सम्झौता नवीकरणको विषयमा भएको छलफल सफल हुन नसकेपनि अध्यक्ष बार्टोमेउले मेस्सी क्लबमै रहनेमा आफू ढुक्क रहेको बताए ।
हालसम्म ६ पटक ब्यालोन डी’ओर जितिसकेका अर्जेन्टिनी फरवार्ड मेस्सीको सम्झौता सन् २०२०-२१ सिजनको अन्त्यसँगै समाप्त हुनेछ । तर बार्टोमेउले गत महिना मेस्सीले क्लबमा नयाँ सम्झौता गर्नेमा विश्वस्त रहेको बताए ।
३३ वर्षीय मेस्सी आफ्नो पूर्व क्लब नेवेल्स ओल्ड ब्वाइज फर्कने चर्चा पनि चलेको थियो । तर बार्टोमेउ भने मेस्सीले बार्सिलोनाबाट नै सन्यास लिने दावी गर्छन् । क्लब इतिहासका सर्वाधिक गोलकर्ता मेस्सी सन् २०२३ सम्म बार्सिलोनामै रहेर सन्यास लिने सम्भावना छ ।
