२६ साउन, काठमाडौं ।
खानेपानी संस्थान बुटवलका प्रमुख इन्जिनियर सन्तोष साह पक्राउ परेका छन्।
उनी बुटबलबाट काठमाडौंतर्फ आइरहेका बेला बाटोबाटै पक्राउ परेका हुन् । घूस लिएको आरोपमा उनलाई सोमबार अख्तियार दुरुपयोग अनुसन्धान आयोगको टोलीले पक्राउ गरेको हो।
संस्थानको लु १ ञ ९५ नम्बरको गाडीमा आइरहेका उनलाई धादिङबाट पक्राउ गरिएको आयोगले जनाएको छ। धुनिबेंसी–८ खानीखोलामा गाडी चेकजाँचका क्रममा उनको साथबाट नगद र बैंकमा पैसा जम्मा गरेको भौचर बरामद भएको थियो।
उक्त रकमको स्रोत उनले खुलाउन सकेनन्। उनको साथबाट नगद २ लाख ३३ हजार ५ सय रूपैयाँ र बैंकमा जम्मा गरेको ८ लाख २२ डजार रूपैयाँको भौचर बरामद भएको आयोगले जनाएको छ।
आयोगको टंगाल कार्यालयबाट खटिएको टोलीले उनलाई नियन्त्रणमा लिएर अनुसन्धान गरिरहेको विज्ञप्तिमा उल्लेख छ।
