४ भदौ, रौतहट ।
रौटहटमा बुधबार राति गोली हानेर एक जना पुजारीको हत्या गरिएको छ। रौतहटको माधवनारायण नगरपालिका–२ खेसरहियामा रहेको हनुमान मन्दिरका पुजारी ६५ वर्षीय श्रीराम साहलाई अज्ञात समूहले गोली हानी हत्या गरेको हो ।
मन्दिर अगाडि खाना खाने तयारी गरिरहेको बेला करिब ९ बजेको अवस्थामा अज्ञात समूहका व्यक्तिहरुले कन्चटमा गोली हानेको जिल्ला प्रहरी कार्यालयका डिएसपी भरत श्रेष्ठले जानकारी दिए ।पुजारी साहको गोली लागेर घटनास्थलमै मृत्यु भएको उनले बताए ।
अहिले गोली हान्ने व्यक्ति फरार छन्। माधवनारायण–२ खेसरहियाको चारै नाका र भारतीय सिमानामा समेत सुरक्षाकर्मी परिचालन गरेर निगरानी बढाइएको प्रहरीले जनाएको छ । घटनाको कारण खुल्न सकेको छैन ।
