५ भदौ, विराटनगर ।
कोरोना संक्रमण रोकथाम तथा नियन्त्रणका लागि विराटनगर महानगर क्षेत्रभित्र भदौ १० गतेसम्म ५ दिनका लागि निषेधाज्ञा जारी गरिएको छ । शुक्रबार बसेको जिल्ला संकट व्यवस्थापन केन्द्र (डिसीसीएमसी)को बैठकले आज शुक्रबार राती १२ बजे देखि भदौ १० गते राति १२ बजेसम्म निषेधाज्ञा जारी गर्ने निर्णय गरेको हो ।
यसअघि विराटनगर महानगरपालिकाले विराटनगर क्षेत्रमा लकडाउन गरेको थियो । महानगरले लगाएको २१ दिनको लकडाउन शुक्रबार समाप्त भएपछि निषेधाज्ञा जारी भएको हो । महानगरले ७ दिन निषेधाज्ञा जारी गर्न प्रस्ताव गरेको भएपनि सुरक्षा समितिले ५ दिन मात्र निषेधाज्ञा गर्ने निर्णय गरेको महानगर मेयर भीम पराजुलीले बताए ।
यस्तै महानगरसहित मोरङको रंगेली नगरपालिकाको ४ , ५, ६, ७ कटहरी गाउँपालिकाको १ , २ , ३, ४, ५ र बुढीगंगा गाउँपालिकाको १,२,३, ४ नम्बर वडामा पनि निषेधाज्ञा जारी गरिउको छ। अहिले पनि हिँडडुल नियन्त्रित अवस्थामै भएपनि थप कडाई गर्न निषेधाज्ञा जारी गर्ने निर्णय गरेको मोरङका प्रमुख जिल्ला अधिकारी कोषहरी निरौलाले जानकारी दिए । निषेधाज्ञामा अत्यावश्यक बाहेकका सम्पुर्ण सेवाहरु बन्द गरिएको उनले बताए ।
पाँच जनाभन्दा बढी हिँडडुल गर्न निषेध गरिने तथा बेलुका ९ बजेदेखि बिहान ५ बजेसम्म हिँडडुललाई पूर्णरुपमा निषेध गरिएको उनले बताए । विराटनगरमा आज शुक्रबार मात्रै २९ जना कोरोना संक्रमित थपिएका छन् ।विराटनगरमा अहिलेसम्म कोरोना संक्रमितको संख्या ७ सय ७४ पुगिसकेको छ ।
