योगेन्द्र योगी
११ भदौ, दोहा ।
कुवेतमा पछिल्ला केही दिन यता विभिन्न कम्पनीमा कार्यरत नेपाली कामदारहरु अलपत्र पर्ने क्रम बढेको छ । काठमाडौँमा एसआरके तथा मदरल्याण्ड म्यानपावर मार्फत विभिन्न समयमा कुवेत पुगेका ८२ जना नेपाली कामदार अलपत्र परेका छन् । कुवेतस्थित वरबा ओइल सर्विसेस कम्पनीमा काम गर्न गएका उनीहरु कोरोनाका कारण सप्लाई कम्पनी बन्द भएपछि ६ महिनादेखि अलपत्र परेका हुन् ।
लपत्र परेको नवलपरासीका मुक्ति प्रसाद न्यौपानेका अनुसार सो कम्पनीमा काम गर्न जाँदा म्यानपावर कम्पनीले उनीहरुबाट प्रतिव्यक्ति १ लाख २० हजार देखि १ लाख ६० रुपैयाँ लिएको थियो । तर, मेनपावरले भनेजस्तो कम्पनी पनि नभएको र तलब पनि नपाएको उनले बताए । अहिले कम्पनी बन्द भएपछि ६ महिनादेखि न काम, न दाम भएर बस्नु परेको पीडितहरुको भनाइ छ ।
कम्पनीले लिएको साइट बन्द भएपछि कम्पनीले वेवास्ता गरेको कारण आफूहरु अलपत्र परेको पीडितहरुले बताएका छन् । कम्पनी प्रशासनलाई आधा की त आधा सेलरी दिन की त घर पठाउन भनेर आग्रह गर्दा काम दिन्छु भन्दै झुक्याउने मात्र गरेको पीडितहरु बताउँछन् ।
उनीहरुले हिजोसम्म कम्पनीले खान दिएको तर आजदेखि खाना दिन नसक्ने भन्दै खाना बन्द गरेको कारण आफूहरु थप समस्यामा पारेको बताएका छन् ।
पीडित न्यौपानेले भने– कम्पनीले खाना पनि बन्द गर्यो आफूहरुसंग पैसा छैन अब कसरी बाच्ने हो ? यो अवस्थामा नेपाल सरकारले हामीलाई छिटो भन्दा छिटो उद्दारको लागि पहल गर्नुपर्यो ।
आफूहरुलाई कम्पनीले खाना बन्द गरेपछि कुवेतस्थित नेपाली दूतावासलाई जानकारी गराएको र दूतावासले चाँडै उद्दार तथा राहतको लागि पहल गर्ने आश्वासन दिएको उनीहरुले बताएका छन् ।
यसअघि पनि एसआरके नेपाल मेनपावर मार्फत कुवेत पुगेर बिचल्ली परेका ३३ नेपालीलाई एनआरएन कुवेतले खाद्यन सहयोग गरेको थियो । अझै उनीहरु पनि कुवेतमै विगत लामो समयदेखि उद्दारको पर्खाइमा रहेका छन् ।
अहिले उनीहरु धमाधम विरामी पर्न थालेका छन् । कुवेत लगायत खाडीका अन्य देशहरुमा अलपत्र पर्ने नेपालीहरुको संख्या दिन प्रतिदिन बढिरहेको छ ।
