योगेन्द्र योगी
१२ भदौ, दोहा ।
कोरोना महामारी लगायत विविध कारणले कतारबाट स्वदेश फर्किन चाहने नेपालीको संख्या अझै १० हजार भन्दा बढी रहेको कतारस्थित नेपाली दूतावासका द्वितीय सचीव भुवन प्रसाद भट्टले जानकारी दिएका छन् । दूतावासले यसअघि कतारबाट स्वदेश फर्किन विभिन्न माध्यमबाट फारम भएका ९ हजार ३ सय ८५ जना नेपालीहरुको सूची सार्वजनिक गरेको थियो ।
दूतावास मार्फत नेपाल फर्कनका लागि ५ हजार ७ सय ५७ जना र कोरोनाका कारण कम्पनीले कामदार कटौती तथा कम्पनी बन्द भएपछि कतारका विभिन्न कम्पनीहरुले ३ हजार ६ सय २८ जना नेपाल कामदारलाई पठाउन विवरण दूतावासलाई उपलब्ध गराएको थियो ।
अहिले रोजगारी गुमाउने नेपालीको संख्या बढेको कारण स्वदेश फर्किनेहरुको संख्या १० हजार भन्दा बढीरहेको सचीव भट्टले बताए । कोरोना महामारी शुरु भएपछि नेपाल फर्किन चाहने नेपालीको संख्या धेरै भएपछि अहिलेसम्म विभिन्न उद्धार उडानमार्फत ५ हजार ५ सय १७ जना नेपाली स्वदेश फर्किसकेको उनले बताए ।
दूतावासका अनुसार अब अगष्ट ३१ तारिखमा हिमालय एयरलाइन्सले उडान गर्ने तय भएको छ । सो उडानमार्फत प्राथमिकतामा परेकाहरुको उद्धार गरिने जनाएको छ । यसअघि टिकट लिएका र दूतावासको सूचीमा परेकाहरुले पुनः प्रमाणित गर्नका लागि सम्बन्धित एयरलाइन्समा सम्पर्क गर्न कतारस्थित नेपाली दूतावासले अनुरोध गरेको ।
स्वदेश फर्कनलेलाई कोरोना भाइरस (कोभिड १९)को पीसीआर परीक्षण कतार सरकारबाट अनुमति प्राप्त विभिन्न निजी अस्पतालमा गएर गर्न सकिने कतारमा रहेको दूतावासले जनाएको छ ।
सरकारले पीसीआर रिपोर्ट नेगेटिभ लिएर आउनेहरुलाई काठमाण्डौमा होटल क्वारेन्टाइनमा बस्न नपर्ने निर्णय गरेको छ । तर पीसीआर रिपोर्ट नलिइ गएकाले काठमाण्डौमा आफ्नै खर्चमा होटल क्वारेन्टाइनमा बस्नु पर्ने समेत दूतावासले जनाएको छ ।
होटेल क्वारेन्टाइनमा बस्नुपर्ने यात्रुको हकमा कम्तीमा ७ दिनको होटेल खर्च पनि आफैले तिर्ने लिखित प्रतिवद्धता समेत टिकट खरिद गर्दाको अवस्थामै गर्नुपर्ने जनाइएको छ ।
विश्वव्यापी महामारीका रुपमा फैलिएको कोरोना संक्रमणका कारण कतारमा रोजगारी गुमाउने नेपालीको सङ्ख्या पनि दिनप्रतिदिन बढ्दो छ । सरकारले भदौ १६ गतेदेखि पीसीआर परीक्षण सहज भएका देशहरुबाट नियमित उडान गर्दैछ ।
