नितेश यादव
१३ भदौ, जनकपुरधाम ।
महोत्तरीमा जिल्लामै पहिलोपटक कोरोना भाइरस संक्रमणको परीक्षण सुरु भएको छ । महोत्तरीको बर्दिवासस्थित सरकारी अस्पतालमा शुक्रबारबाट पीसीआर परीक्षण सुरु गरिएको बर्दिवास नगरपालिकाका मेयर बिदुर कार्कीले जानकारी दिए । उनले नगरपालिकाले ९५ लाख रुपैयाँको आर्थिक लगानीमा पीसीआर मेसिनसहितको कोरोना परीक्षण मेसिन खरिद गरेको बताए
। उनले गत असारमा उद्घाटन गरिएको बर्दिवास अस्पतालको तीन तले नयाँ भवनमा पीसीआर मेसिन जडान गरिएको बताए । कोभिड १९ परीक्षण गर्ने जनशक्ति पर्याप्त भए एक दिनमा बर्दिवासबाट करिब नौ सय नमूनाको रिजल्ट आउने मेयर कार्कीले बताए । उनका अनुसार अहिले जनशक्ति पर्याप्त नभएकाले क्षमता अनुसारको परीक्षण भइरहेको छैन ।
क्षमता अनुसार पीसीआर मेसिन सञ्चालन गर्न १२ जना स्वास्थ्यकर्मी आवश्यकता पर्ने भएपनि हाल ६ जनामात्रै कार्यरत रहेको उनको भनाइ छ । शुक्रबार अस्पतालमा १० जनाको स्वाब संकलन गरी परीक्षण गरिएको छ । बर्दिवास अस्पतालमा आएको रिपोर्ट पुनः भेरिफाइ गर्न राति नै जनकपुर स्थित प्रादेशिक जनस्वास्थ्य प्रयोगशालामा पठाइएको उनले बताए ।
