१६ भदौ, विराटनगर ।
पछिल्लो समय देशभर कोरोना संक्रमितको संख्या बढ्दै गएपछि अस्पतालमा बेड नभएर धेरै संक्रमित होम आईसोलेसनमा बस्न बाध्य छन । यो संक्रमितको चाहना नभएपनि बाध्यता बनेको छ । सरकारले संक्रमितहरु होम आईसोलेसन बस्न सक्ने र उपचारको व्यबस्था मिलाउने भनेपछि संक्रमितहरु घरमै बस्दै आएका छन् । तर, सरकारले भनेअनुसारको ब्यवस्था नहुँदा संक्रमितहरुको घरमै ज्यान जान थालेको छ।
घरमा आइसोलेसनमा बसेर कोरोनामुक्त भएकाहरु सरकारी स्वास्थ्य अधिकारीहरुले एकपटकपनि सोधी खोजी नगरेको बताउँछन् । यही भदौ ५ गते विराटनगर–६ सरौचियाका ४५ वर्षीय पुरुषको मृत्यु भयो । त्यस्तै शनिबार भक्तपुर नगरपालिका–१ दुधपाटीका ६५ वर्षीय वृद्धको घरमै मृत्यु भयो । यी दुवै जनाको सरकारले आवश्यक समन्वय नगर्दा बेलैमा उपचार नपाएर मृत्यू भएको परिवारमो गुनासो छ । दैनिक संक्रमितहरु बढिरहेका बेला अहिलेनै समन्वयको अभाव देखिँदा भविष्यमा भयावह स्थिति आउन सक्ने कुरालाई नर्कान सकिँदैन ।
स्वास्थ्य तथा जनसंख्या मन्त्रालयले होम आइसोलेसनमा बसेका संक्रमितको निगरानी र स्वास्थ्य अवस्थाबारे जानकारी लिनका लागि सम्बन्धित स्थानीय तहले स्वास्थ्यकर्मीको व्यवस्था गर्नुपर्ने भनेको छ । संक्रमितको फलोअफमा खटाइएका स्वास्थ्यकर्मीले फोन एसएमएसबाट दिनमा कम्तिमा दुई पटक संक्रमितको स्वास्थ्य अवस्थाबारे जानकारी लिएर त्यसलाई अध्यावधिक गर्ने काम गर्नुपर्ने हुन्छ । घरमा बसेका संक्रमितको अवस्थाबारे नियमित रुपमा स्वास्थ्यकर्मीले सम्बन्धित स्थानीय तहलाई जानकारी गराउनु पर्ने हुन्छ।
स्वास्थ्यकर्मीले एक जना बिरामी हेरेबापत स्वास्थ्यकर्मीलाई दैनिक २०० सयका दरले सरकारले पारिश्रमिक उपलब्ध गराउने छ । तर, यो प्रावधान अहिलेसम्म कागजमै सिमित भएको होम आयसोलेसनमा बसेर संक्रमणमुक्त भएकाहरु बताउछन । अहिले पनि स्थानीय सरकारले समन्वय नगर्दा संक्रमितहरुको हेरचाह हुने गरेको छैन । विराटनगरमा मात्रै आइतबार साँझसम्म ६०६ जना संक्रमितहरु होम आईसोलेसनमा बसेका छन् । संक्रमित भएको १५ दिनमा महानगरको टोलीले एक पटकमात्र सम्पर्क गरेको र त्यसपछि आफ्नो स्वास्थ्य अवस्थाको जानकारी कसैले नलिएको विराटनगर–३ मा होम आईसोलेसनमा बसेका एक संक्रमितले बताए । अर्का संक्रमित पनि आफुलाई स्वास्थ्य अवस्था बुझ्न सम्पर्क नगरेको बताउँछन् । संक्रमितहरुले जिम्मेवार निकायले उपचारको आवश्यक प्रवन्ध गर्ने र होम आइसोलेसनमा बसेकाहरुलाई चिकित्सकीय परामर्श दिने दायित्व बिर्सर्ने गरेको संक्रमितहरुको गुनासो छ ।
यता उच्च अदालत विराटनगरले पनि होम आइसोलेसनमा बसेकाको पनि नियमित स्वास्थ्यको जानकारी लिई आवश्यक उपचारको व्यवस्था मिलाउन र त्यस्तो विवरण पनि राख्न आदेश दिएको छ । अदालतले संक्रमितहरु घरमा नै आइसोलेसनमा बसिरहँदा उनीहरुको अवस्था गम्भीर भई अस्पताल लैजानुपरेमा एम्बुलेन्सको उचित प्रबन्ध मिलाउन र त्यसको जानकारी लिन सक्ने गरी टेलिफोनको व्यवस्था गर्ने सम्बन्धित निकायलाई आदेश दिएको छ । अदालतको सो आदेशको पनि पूर्ण कार्यान्वयन नभएको पाइएको छ ।
