१८ भदौ, काठमाडौं । अमेरिकामा राष्ट्रपतीय चुनावअघि मानिसहरुलाई कोरोना भाइरसको खोप दिने योजनाले चिन्ता थपिएको छ ।
रोग नियन्त्रण तथा रोकथाम केन्द्र (सीडीसी) ले ५० राज्यका स्वास्थ्य अधिकारीहरुलाई नोभेम्बर १ देखि खोपको वितरणका लागि तयार रहन भनेको छ ।
न्युयोर्क टाइम्सका अनुसार गएको २७ अगस्टमा पठाइएको तीन दस्तावेजमा अज्ञात खोप वितरण गर्नको लागि विवरण दिइएको छ ।
सबैभन्दा पहिलो खोप स्वास्थ्यकर्मीलाई, ६५ वर्षभन्दा माथिका उमेरका व्यक्ति र सङ्क्रमणको धेरै जोखिममा रहेको समुदायलाई दिइने जनाइएको छ ।
अमेरिकामा धेरै खोपहरुको क्लिनिकल परीक्षण भइरहेको छ र केही खोप परीक्षणको अन्तिम चरणमा रहेको बताइएको छ ।
अमेरिकाका वरिष्ठ संक्रामक रोग विशेषज्ञ डाक्टर एन्थनी फाउचीले यदि खोपको परिणाम अत्यधिक सकारात्मक भए परीक्षणअघि नै खोप दिन सक्ने बताएका छन् ।
तर अन्य वैज्ञानिकहरु भने सीडीसीको यो घोषणा पछाडि राजनीति रहेको बताउँछन् । उनीहरुले अमेरिकी चुनाव र खोपको समयलाई लिएर चिन्ता व्यक्त गरेका हुन् ।
