२१ भदौ, जनकपुरधाम ।
कोरोना महामारीले हरेक क्षेत्रलाई प्रत्यक्ष प्रभाव पारेको छ । यसले मानिसको स्वास्थ्य, देशको अर्थतन्त्रमा मात्र नभई समाजमा अपराध पनि उतिकै बढाएको छ । शनिबार महोत्तरीमा एकै दिन तीन जनाले आत्महत्या गरेका छन् ।
महोत्तरीको एकडारा गाउँपालिकाका १५ वर्षका किशोर, गौशाला नगरापालिकाका ३६ वर्षीय युवक र भंगहा नगरपालिकाका ६५ वर्षका वृद्धसहित तीनजनाले आत्महत्या गरेको जिल्ला प्रहरी कार्यालय महोत्तरीका प्रहरी नायव उपरिक्षक प्रकाश विष्टले जानकारी दिए । डी
एसपी विष्टका अनुसार महोत्तरीको एकडारा गाउँपालिका ४ हल्खोरीका १५ वर्षीय रजनिसकुमार यादवले आफ्नै घरको धुरीमा झुन्डिएर आत्महत्या गरेका छन् भने गौशाला नगरपालिका ८ का ३६ वर्षीय मनोज महतो सुडीले घरदेखि १ सय ५० मिटर उत्तर पश्चिम वडा नं ४ मा रहेको पानी ट्याङकी नजिक आँपको रुखमा झुन्डिएर आत्महत्या गरेका छन् । त्यस्तै, जिल्लाकै भंगहा नगरपालिका ७ मेघरौलका ६५ वर्षीय गणेशी ठाकुरले समेत आँपको रुखमा धोतीको पासो लगाएर झुण्डिएर आत्महत्या गरेको डीएसपी विष्टले बताए ।
मृतक तीनै जनाको शनिबार नै शवको पोष्टमार्टम गरेर परिवारजनलाई बुझाएको र घटना सम्बन्धमा थप अनुसन्धान भइरहेको विष्टको भनाइ छ । चैत ११ गते यता लकडाउन तथा निषेधाज्ञाको अवधिमा मात्र महोत्तरीमा २० जनाभन्दा बढी व्यक्तिले आत्महत्या गरेका छन । जसमध्ये एकजना कोरोना संक्रमितले समेत आत्महत्या गरिसकेको प्रहरी तथ्यांकमा उल्लेख छ ।
