२८ भदौ, दमक ।
नगर बाल सञ्जाल दमकले राष्ट्रिय बाल दिवसको अवसरमा आज भर्चुअल माध्यामबाट बालमैत्री संवाद शिर्षकमा छलफल कार्यक्रम सम्पन्न गरेको छ ।
बालअधिकार तथा बालमैत्री स्थानीय शासनका लागि सरोकारवाला सबै क्षेत्रका प्रतिनिधिहरुलाई सहभागी गराईएको छलफलमा शिक्षा क्षेत्रबाट पूर्व स्रोत व्यक्ति एवं ढुकुरपानी मा.वि. का प्रधानाध्यापक कृष्ण भण्डारी, स्वास्थ्यबाट बालरोग विशेषज्ञ डा. जयमणि श्रेष्ठ, नगर सामाजिक विकास समितिबाट चन्द्रकला वि.क., सामाजिक संस्थाका तर्फबाट सन्दिप चापागाँई, प्रहरीबाट इलाका प्रहरी कार्यालय दमकका प्रमुख विजयराज पण्डित, अभिभावकका तर्फबाट शंकर चापागाँई (धनकुटे कान्छा) र बालबालिकाबाट हेलियन बस्नेतको सहभागिता रहेको थियो । सहभागी सबैले नगरको बालमैत्री लक्ष्यमा आफ्नो क्षेत्रबाट भूमिका निभाउन तत्पर रहेको बताएका थिए ।
सहभागी सबै बालबालिकाले बालमैत्री वातावरण पाउन नसकिरहेको बताउँदै यसका लागि हरेक अभिभावक सहित स्थानीय सरकार, विद्यालय सबै सजग हुनुपर्नेमा जोड दिएका थिए । प्रधानाध्यापक कृष्ण भण्डारीले समग्र सबै विद्यालयका सबै वातावरण एवं पूर्वाधार बालमैत्री बनि नसकेको र बालमैत्री पूर्वाधार बन्ने चरणमा रहेको जानकारी गराएका थिए ।
डा. जयमणि श्रेष्ठ र सामाजिक विकास समिति सदस्य चन्द्रकला वि.क.ले दमकका बालबालिकाको समग्र स्वास्थ्यको अवस्थामा सन्तोषजनक रहेको तर बाल स्वास्थयका लागि प्रर्याप्त पूर्वाधार विकास नभैसकेको साथै नगरपालिका बालमैत्री अभियानमा लागेकामा कतिपय काम लकडाउनका कारणले रोकिएको र लगतै बालमैत्री रणनिति योजना बमोजिम काम अगाडि बढाउने योजनामा नगरपालिका रहेको बताएका थिए ।
जुम भर्चुअल संवादमा सामाजिक संस्थाका प्रतिनिधि सन्दिप चापागाँईले सामाजिक संस्था बालअधिकार र बालमैत्री प्रति केन्द्रित रहेको साथै नगरपालिकाले सामाजिक संस्थालाई विभिन्न सुचकहरुमा जिम्मेवारी छुट्टयाएर काम लगाउन समन्वय गरे सामाजिक संस्थाहरुको सक्रियता रहने बताए । प्रहरीका तर्फबाट विजयराज पण्डितले विद्यालयमा बालबालिकासँग अन्तरक्रियात्मक कार्यक्रम गरेर बालबालिकालाई कसुरबाट बच्न र भैहाले प्रहरीमा खबर गर्नेबारे जानकारी दिने गरेको बताए ।
कार्यक्रममा नगर प्रमुख रोमनाथ ओलीले दमक नगरपालिका बालमैत्री अभियानमा बढेकाले अब सबै क्षेत्रको सुधार गर्दै बाल सहभागिता, शिक्षा, स्वास्थ्य लगायत सबै पूर्वाधारलाई बालमैत्री बनाउन नगरपालिका केन्द्रित छ र बालमैत्रीका लागि घरपरिवारबाट पहिलो काम सुरु गर्नुपर्छ भन्ने धारणा व्यक्त गरे । साथै अभिभावक एवं बालबालिकाकाले बालमैत्री नगरको लक्ष्यका लागि साथ सहयोग रहने बताएका थिए ।
बाल सञ्जालले सोमबार बाल दिवसका दिन शिक्षा मन्त्री गिरीराजमणि पोखरेलको प्रमुख आतिथ्यमा कलाकारहरु मनोज गजुरेल, राजा राजेन्द्र र सुरक्षा पन्तका साथ बालानुभव वार्तालाप कार्यक्रम सञ्चालन गदैछ । कार्यक्रममा अतिथि वक्ताहरुसँगे बाल्यकालका विषयमा संवाद गरिने नगर बाल सञ्जाल दमकका सचिव राम खतिवडाले जानकारी दिए ।
