६ आश्विन, गुल्मी ।
गुल्मीको इस्मा गाउँपालिका–२ हस्तिचौरको रातचौरमा पहिरोले पुरिएर दुई जनाको ज्यान गएको छ ।
स्थानीय ३८ वर्षका प्रेम बहादुर कुमाल र ५ वर्षका सफल कुमालको पहिरोले पुरेर ज्यान गएको इस्मा प्रहरीचौकी इन्चार्ज मोहनलाल अधिकारीले जानकारी दिए । सोमबार राति सडकमा हिंडिरहेका दुवै जनालाई पहिरोले पुरेको थियो । उनीहरूलाई पहिरोले बगाएर छल्दीपना खोला नजिकको कुलोमा ल्याएको थियो ।
दुबैजनाको पहिरोले पुरेको अवस्थामा शव फेला पारिएको जिल्ला समन्वय समिति सदस्य राम मल्ल ठकुरीले जानकारी दिए । झण्डै तीन घण्टा लगाएर नेपाली सेना, सशस्त्र प्रहरी, नेपाल प्रहरीसहित स्थानीयले पहिरोमा पुरिएकाको शव निकालेका हुन् ।
दुबैजनाको शव पोस्टमार्टमको लागि गुल्मी अस्पताल तम्घास ल्याइँदै गरेको उद्धारमा संलग्न सशस्त्र प्रहरी निरीक्षक कमलेशकुमार महत्तोले जानकारी दिए ।
