१५ साउन,एजेन्सी ।
चीनले आफ्नो अन्तरिक्ष केन्द्रमा पठाएको एउटा रकेटको भग्नावशेष अन्तरिक्षबाट पृथ्वीमा खसेको छ । उक्त भग्नावशेष हिन्द र प्रशान्त महासागरमा खसेको अमेरिकी र चिनियाँ अधिकारीले जनाएका छन् । उनीहरूका अनुसार लङ मार्च फाइभबी रकेटका भग्नावशेषहरू खसेका हुन् ।
चिनियाँ अन्तरिक्ष निकायका अनुसार उक्त रकेटको अधिकांश भग्नावशेष वायुमण्डलमा जलेको थियो । प्रशान्त महासागरस्थित सुलु सागरमा रकेटको मुख्य भाग अवतरण गरेको चीनले जनाएको छ । यसअघि नै अन्तरिक्षविज्ञहरूले पनि उक्त रकेट मानवबस्ती भएको स्थानमा खस्ने सम्भावना निकै कम भएको बताएका थिए । रकेटको ’कोर स्टेज’ भनिने आधारभूत संरचना यसरी अनियन्त्रित रूपमा पृथ्वीमा आएका कारण अन्तरिक्षमा हुने फोहोरको उत्तरदायित्वसम्बन्धी प्रश्न उठेको बीबीसीले जनाएको छ ।
अमेरिकी अन्तरिक्ष प्रशासन नासाले चिनियाँ अन्तरिक्ष निकायलाई रकेट पृथ्वीमा फर्किँदा ससाना टुक्रा हुनेगरी विघटित हुने खालको अन्तर्राष्ट्रिय प्रचलनअनुसारको ढाँचा बनाउन आग्रह गर्दै आएको छ । तर मंगलवार चिनियाँ सरकारी समाचारपत्र ग्लोबल टाइम्सले पश्चिमा सञ्चारमाध्यमहरू अमेरिकाको नेतृत्वमा लङ मार्च फाइभको तेजोबध गर्ने अभियानमा लागेको आरोप लगाएको थियो । चीनले अन्तरिक्षमा आफ्नो छुट्टै केन्द्र बनाइरहेको छ । चीनले गत आइतवार एउटा ल्याब मोड्यूलसहित लङ मार्च फाइभ रकेट ट्येन्गूङ केन्द्र पठाएको थियो ।
चीन सरकारले बुधवार उक्त रकेट फर्किँदा सम्भवतः समुद्रमा अवतरण गर्ने भएकाले मानिसहरूलाई कम जोखिम भएको बताएको थियो । यद्यपि रकेटका टुक्राहरू मानवबस्ती भएको स्थानमा खस्न सक्ने सम्भावना भने थियो । सन् २०२० को मे महिनामा रकेटको टुक्रा आइभोरी कोस्टमा खस्दा केही क्षति पुगेको थियो ।
द एरोस्पेस कर्पोरेशनका अनुसार पृथ्वीको वायुमण्डलमा नजल्ने फोहोर बसोबासयुक्त क्षेत्रमा खस्न सक्छ। तर, यो भग्नावशेषबाट कसैलाई नोक्सान हुने सम्भावना निकै कम हुन्छ । अमेरिकाको ओर्बिटल डोबरीज मिटिगेसन स्ट्यान्डर्ड प्र्याक्टिसेसले २०१९ मा जारी गरेको प्रतिवेदन अनुसार रकेट अनियन्त्रित भएर पृथ्वीमा पुनः प्रवेश गर्दा हुन सक्ने हताहती १० हजारमा एक हो ।
