विराटनगर, बैशाख २२
प्रदेश १ को स्थायी राजधानीका ४ वटा प्रस्ताव संसद सचिवालयमा दर्ता भएका छन् । नामको विषयमा भने कुनै पनि दलले प्रस्ताव नै नहालेको संसद सचिवालयले जनाएको छ । पत्रकार सम्मेलन गर्दै १ नम्बर प्रदेशसभा सचिवालयका सचिव गोपालप्रसाद पराजुलीले दिएको जानकारी अनुसार दर्ता भएका प्रस्तावमध्ये २ वटामा धनकुटा प्रस्ताव गरिएको छ भने नेकपा संसदीय दलको तर्फबाट विराटनगर राजधानी हुनुपर्ने प्रस्ताव गरिएको छ ।
यस्तै नेपाली कांग्रेसले पनि विराटनगर नै राजधानी हुनुपर्ने माग गर्दै अर्काे प्रस्ताव दर्ता गराएको छ । प्रदेशसभामा दुई तिहाइ मत रहेको नेकपाले विराटनगर राजधानी हुनुपर्ने प्रस्ताव गरेको छ । उक्त प्रस्तावको कैफियतमा कार्यपालिका, व्यवस्थापिका लगायतका अन्य संरचनाहरु वृहत विराट क्षेत्र अन्तरर्गत विराटनगर, इटहरी र सुन्दरहरैंचा आसपासमा रहनेछ भन्ने उल्लेख छ ।
उक्त प्रस्तावको प्रस्तावक बुद्धिकुमार राजभण्डारी र समर्थकहरुमा लिलम बस्नेत, विजयकुमार विश्वास, राजकुमार ओझा, यशोदा अधिकारी र सावित्रीकुमारी रेग्मी रहेका छन् । यस्तै धनकुटा राजधानीको प्रस्तावक लिला सुब्बा रहेको प्रस्तावमा प्रताप प्रकाश हाङ्गाम र रामचन्द्र लिम्बू समर्थक रहेका छन् ।
यस्तै निरन राई प्रस्तावक रहेको धनकुटालाई राजधानी बनाउने प्रस्तावको समर्थक इन्द्रमणी पराजुली, कुशुमकुमारी श्रेष्ठ, बिनादेवी राई रहेका छन् । यस्तै विराटनगर महानगरपालिका भित्रै राजधानी हुनुपर्छ भन्ने प्रस्तवाका प्रस्तावक केदार कार्की रहनुभएको छ भने समर्थकमा शिवनारायण गनगाई र जयराम यादव रहेको सचिव पराजुलीले जानकारी दिए ।
धनकुटा राजधानी बनाउनु पर्छ भन्दै प्रस्ताव पेश गर्ने निरन राई नेकपाका सांसद हुन् भने धनकुटालाई नै राजधानी माग गर्दै अर्को प्रस्ताव पेश गर्ने लिला सुब्बा संघीय समाजवादी फोरमकी सांसद हुन् । विराटनगर राजधानी बनाउने र प्रशासनिक संरचना इटहरी, सुन्दरहरैंचा आसपास राख्ने प्रस्ताव नेकपा संसदीय दलको आधिकारिक प्रस्ताव हो भने विराटनगर माहानगरपालिकामा नै राजधानी तोकिनुपर्छ भन्ने प्रस्ताव नेपाली कांग्रेसकोे रहेको छ ।
