२० भदौ, विराटनगर ।
राष्ट्रिय स्वतन्त्र पार्टी (रास्वपा) ले बारा जिल्ला सभापति चन्दन स्वर्णकारलाई पार्टीको जिम्मेवारीबाट मुक्त गरेको छ । रास्वपाको स्थापनाकालदेखिनै जिल्ला सभापति र जिल्ला संयोजकको जिम्मेवारी पाएका उनलाई अनुशासनको कारबाहीसहित पार्टीको जिम्मेवारीबाट हटाइएको हो ।
बारा संयोजकबाट पदमुक्त भएका स्वर्णकारले हालसम्म आफूलाई साथ दिने सबैलाई धन्यवाद दिएका छन् । आफूलाई विश्वास गरी पार्टीलाई मजबुत बनाउन भूमिका निर्वाह गर्ने सम्पूर्ण बारावासीहरूमा उनले धन्यवाद दिएका हुन् ।
सामाजिक सञ्जालमार्फत् उनले भनेका छन्, ‘राष्ट्रिय स्वतन्त्र पार्टी बारा र मधेस प्रदेश समेतको जिम्मेवारीमा रहँदा गर्नुपर्ने कामहरूमा पार्टीको विधि विधान तथा बारावासी र मधेस प्रदेशवासीहरुको जनभावना बमोजिम गरेको छु । अगामी दिनहरूमा समेत गरिरहने नै छु । हालको लागि राष्ट्रिय स्वतन्त्र पार्टीले मलाई दिएको सम्पूर्ण जिम्मेवारीहरू बाट अलग भएको मेरा सम्पूर्ण बारावासीहरू लगायत मधेस प्रदेशवासिहरुमा जानकारीको लागि अनुरोध गर्दछु ।’
चन्दनमाथि पार्टी केन्द्रीय अनुशासन आयोगमा एक महिलामाथि यौन दुर्व्यवहार गरेको तथा नशालु पदार्थ ख्वाई आशय करणी गरेको भन्दै उजुरी परेको थियो ।
