१२ बैशाख, काठमाडौं । संघीय प्रतिनिधिसभाको सार्वजनिक लेखा समितिको निर्देशन उल्लंघन गर्दै नेपाली सेनाले काठमाडौं–तराई द्रुतमार्गको प्याकेज–२ को टेन्डर अघि बढाएको छ ।
लेखा समितिले चैत १९ गते आर्थिक प्रतिस्पर्धा नहुने भन्दै टेन्डर रद्द गरी पुनः नयाँ प्रक्रिया सुरु गर्न निर्देशन दिएको थियो ।
पूर्वयोग्यता छनोट गर्दा चीनको पोली च्याङ्दा इन्जिनियरिङ कम्पनी लिमिटेड मात्रै टेन्डर हाल्न योग्य देखिएपछि आर्थिक प्रतिस्पर्धा नहुने समितिको ठहर छ ।
तर, सेनाले आइतबार सुरुङमार्ग र पुलका लागि गरिएका दुईवटा टेन्डरको नोटिस अफ लेटर अफ इन्टेन (एलओई) जारी गरेको छ।
पहिलो प्याकेजमा चाइना स्टेट कन्स्ट्रक्टिङ इन्जिनियरिङ कर्पोरेसन र दोस्रो प्याकेज अन्तर्गत पोलि च्याङ्दा इन्जिनियरिङ कर्पोरेसन छनोट भएका छन् ।
चाइना स्टेट कन्स्ट्रक्टिङले १८ अर्ब ७३ करोड ७१ लाख रुपैयाँ बराबरको बिड गरेको थियो भने पोलिच्याङदाले २५ अर्ब २ करोड ९२ लाखको बिड गरेको थियो ।
सेनाले चैत २१ मा प्रिक्वालिफिकेसनमा छनोट भएका दुईवटै प्याकेजको आर्थिक प्रस्ताव खोलेर मूल्याङकन गरेको हो ।
दुवै प्याकेजमा प्रि क्वालिफिकेसनमा छनोट भएका कम्पनी प्राविधिक पास भएपछि आर्थिक प्रस्ताव मागिएको थियो ।
