१३ असोज, विराटनगर ।
विराटनगर महानगरपालिका वडा नं.११ स्थित बसपार्कको हाताभित्र नवनिर्मित प्रहरी विट तथा नागरिक सहायता कक्षको उद्घाटन गरिएको छ । सोमबार संघीय मामिला तथा सामान्य प्रशासन मन्त्री लालबाबु पण्डितले उद्घाटन गरी जिल्ला प्रहरी कार्यालय मोरङलाई हस्तान्तरण गरेका हुन् ।
विराटनगर बसपार्क ब्यवस्थापन समितिले आयोजना गरेको सो कार्यक्रममा मन्त्री पण्डितले शान्ति सुरक्षा जस्तो अत्यन्तै महत्वपूर्ण, संवेदनशील तथा चुनौतीपूर्ण कार्यमा खटिने प्रहरीलाई सबै भन्दा उत्तम र पर्याप्त साधनश्रोत उपलब्ध गराउन सकेमा नागरिकले अझ छिटो, छरितो र प्रभावकारी रूपमा अपराधको रोकथाम अनुसन्धान र शान्ति ब्यवस्था कायम गर्न सक्ने बताए ।
त्यस्तै जिल्ला प्रहरी कार्यालय मोरङका प्रमुख प्रहरी उपरीक्षक विश्व अधिकारीले नवनिर्मित प्रहरी विटले बसपार्क, यातायात तथा यात्रुहरूको सुरक्षाका साथै प्रहरी सेवा प्रवाहको गुणस्तरमा अभिबृद्धि हुने बताए । उनले विराटनगर बसपार्क ब्यवस्थापन समितिलाई प्रहरी विट निर्माणका लागि हार्दिक धन्यवाद दिंदै आजैबाट उक्त कक्षबाट चाडवाड लक्षित यात्रु सहायता डेस्क समेत संचालनमा ल्याएको बताए ।
कार्यक्रमका बसपार्क ब्यवस्थापन समितिका अध्यक्ष पदमकुमार श्रेष्ठले बसपार्कमा भएको हालसम्मको निर्माण तथा भावी योजनाको बारेमा प्रतिवेदन प्रस्तुत गरेका थिए ।
