२२ पुष, एजेन्सी ।
अलास्का एयरलाइन्सको विमान उडिरहेका बेला एक टुक्रा भाँचिएर अलग भएपछि अमेरिकाले प्राविधिक जाँच गर्नुपर्ने भन्दै १७१ वटा बोइङ विमानको उडान रोकेको छ । अमेरिकाको संघीय उड्डयन प्रशासनले १७१ वटा विमानलाई प्राविधिक जाँच पूरा नहुन्जेल उडानमा रोक लगाउने निर्णय गरेको हो ।
संघीय उड्डयन प्रशासनका अनुसार यो निर्णयबाट अमेरिकाका ‘बोइङ ७३७ म्याक्स ९’ का १७१ विमान प्रभावित हुनेछन् । युनाइटेड एयरलाइन्सले आफ्ना ७९ वटा ‘बोइङ ७३७ म्यास ९’ विमानमध्ये केहीको संघीय उड्डयन प्रशासनले प्राविधिक जाँच गरेको जनाएको छ । प्राविधिक जाँच गर्नुपर्दा ६० वटा उडान रद्द हुने सम्भावना छ ।
किनभने एउटा हवाई जहाज जाँच गर्दा चारदेखि आठ घण्टासम्म समय लाग्ने बताइएको छ । गत शुक्रबार अमेरिकाको पोर्टल्याण्ड (ओरेगान)बाट ओन्टारियो –क्यालिफोर्निया) गइरहेको अलास्का एयरलाइन्सको हवाई जहाजको एक भाग हावाको दबावमा फुटेर जहाजबाट अलग भएको थियो ।
त्यसपछि हवाई जहाजलाई आकस्मिक अवतरण गराउनु परेको थियो । उक्त हवाई जहाजमा १७१ यात्री र चालक दलका ६ सदस्यहरु थिए । उनीहरु सबै सकुशल छन् । यो घटनालगत्तै अलास्का एयरलाइन्सले आफ्ना सबै ६५ वटा बोइङ विमानका उडान बन्द गरेको थियो ।
उसले प्राविधिक जाँच गराउने र फेरि उडान अनुमति नपाएसम्म सेवा बन्द गर्ने जनाएको छ । संघीय उडड्नले बोइङ ७३७ म्याक्सको निरीक्षणलाई नजिकबाट अनुगमन गरिरहेको र विमामन आवश्यक हार्डवेयर फेला नपरेमा थप कारबाही गर्ने विचार गर्ने बताएको छ ।
२०१८ र २०१९ मा खराब डिजाइन गरिएको ककपिट सफ्टवेयरसँग जोडिएको दुईवटा घातक दुर्घटनाहरूले इथियोपिया र इन्डोनेसियामा ३४६ जनाको ज्यान लिएपछि ७३७ म्याक्स २० महिनाको लागि विश्वव्यापी रूपमा ग्राउन्डेड गरिएको थियो ।
बोइङ आफ्नो सानो ७३७ म्याक्स ७ र ठूलो म्याक्स १० को प्रमाणीकरणको लागि पर्खिरहेको छ। इसका लागि संघीय उडड्नले म्याक्सलाई वर्षौंदेखि सावधानीपूर्वक छानबिन गरिरहेको छ ।
