२३ असोज, एजेन्सी । कोरोनाभाइरसको खोप बनाउने र विभिन्न मुलुकमा २ अर्ब डोज वितरण गर्ने विश्वव्यापी अभियानमा चीन पनि औपचारिक रूपमा जोडिएको छ ।
चिनियाँ विदेश मन्त्रालयकी प्रवक्ता हुवा चुनयिङले शुक्रबार कोभ्याक्स नाम दिइएको उक्त अभियानमा आफ्नो देश पनि जोडिएको जानकारी दिइन्।
पछिल्लो समय ठूला मुलुकहरूबीच देखिएको ‘खोप राष्ट्रवाद’ लाई छोडेर विश्वव्यापी अभियानमा जोडिने चीन सबैभन्दा ठूलो अर्थतन्त्र हो।
सुरूमा बेइजिङले कोभ्याक्स अभियानमा जोडिन ढिला गरेको थियो। यस अभियानमा विश्व स्वास्थ्य संगठन, गाभी, द भ्याक्सिन अलाइन्स र द कोलियसन फर एपिडिमिक प्रिपेडनेस एन्ड इनोभेसन्सलगायत संस्थाहरू छन्।
यसको अनुसन्धान तथा वितरणमा लाग्ने खर्च भने विकसित तथा विकासशील राष्ट्रहरूले व्यहोर्नु पर्नेछ।
एक सय ५६ राष्ट्र जोडिएको यस अभियानको उद्देश्य कोभिड(१९को खोप प्रदान गर्नु हो। सुरूमा खोप हरेक राष्ट्रका जोखिममा रहेका ३ प्रतिशत जनसंख्यालाई प्रदान गरिनेछ।
त्यसपछि सबै मुलुकका २० प्रतिशत जनसंख्याकालाई खोप दिइने छ।
विश्व स्वास्थ्य संगठनका निर्देशक टेड्रोस अडानोम गेब्रियससले खोप सबै राष्ट्रमा पुग्ने तर सबैलाई नदिइने बताएका थिए।
गत वर्ष डिसेम्बरमा चीनको वुहानमा पहिलो पटक देखिएको संक्रमणविरूद्ध लड्न छिटो केही नगरेको भन्दै आलोचना भएको थियो। अहिले कोभ्याक्समा जोडिएपछि बेइजिङले आफ्नो छवि सुधारेको छ।
यसअघि प्रतिस्पर्धीको रूपमा रहेको संयुक्त राज्य अमेरिकाले बेइजिङ यस अभियानमा जोडिन नसक्ने बताएको थियो।
कोभिड(१९को खोपको तेस्रो चरणको क्लिनिकल ट्रायलमा अग्रणी स्थानमा रहेका चार राष्ट्रमध्ये चीन पनि एक हो।
स्वास्थ्य अधिकारीहरूले भ्याक्सिन नोभेम्बर वा डिसेम्बरसम्ममा आइसक्ने बताएका छन्।
