१९ कात्तिक, काठमाडौं ।
स्वास्थ्य तथा जनसंख्या मन्त्रालयले होम आइसोलेसनमा बसेका कोरोना संक्रमितलाई चिकित्सकको सल्लाह विना कुनैपनि औषधिको प्रयोग नगर्न आग्रह गरेको छ ।
मन्त्रालयको आजको प्रेस व्रिफिङमा मन्त्रालयका प्रवक्ता प्रा. डा. जागेश्वर गौतमले जथाभावी औषधिहरू प्रयोग गर्दा थप जोखिम बढ्न सक्ने हुनाले सम्वन्धित चिकित्सकको सल्लाहविना कुनैपनि औषधि प्रयोग नगर्न सबैलाई अनुरोध गरे।
होम आइसोलनमा रहेका संक्रमितले चिकित्सकको स्वीकृतिविना संक्रमणमुक्त भइसकेका व्यक्तिहरूले प्रयोग गरेको औषधि प्रयोग गर्ने गरेको पाईएको प्रवक्ता प्रा. डा. गौतमले बताए।
प्रवक्ता प्रा. डा. गौतमले लामो समय आइसोलेसनमा एक्लै बस्दा अत्यास लाग्ने, खानामा रूची नहुने जस्ता समस्या आएर संक्रमित मानसिक तथा शारीरिक रुपमा कमजोर हुन सक्ने भएकोले थोरै–थोरै गरी पटक–पटक खाना खान तथा पुस्तक पढ्ने, फिल्म हेर्ने एवं घरमा बसेर गर्न मिल्ने अन्य सिर्जनात्मक काममा समय खर्चन समेत सुझाव दिए ।
यसैगरी, स्वास्थ्य तथा जनसंख्या मन्त्रालयले काभिड प्रयोगशाला सञ्चालन गर्ने सबै अस्पताल तथा मेडिकल कलेजहरूले होम आइसोलेसनमा रहेका व्यक्तिहरू संग टेलिकम्युनिकेसन तथा टेलिकन्सल्टेनस गर्नुपर्ने व्यवस्था समेत गरेको प्रवक्ता प्रा. डा. गौतमले जनाकारी दिए।
प्रवक्ता प्रा. डा. गौतमले नेपाल प्रहरी अस्पताललाई ३ सय शैयाको अस्थायी कोभिड अस्पताल सञ्चालनको स्वीकृति दिएको समेत जानकारी दिए ।
