१ मंसिर, जुम्ला । तिहारका लागि जाजरकोटबाट जुम्ला हिँडेका दुई जना बीच बाटोमै अलपत्र परेका छन् ।
हिमपातका कारण जुम्लाको तिला गाउँपालिका ४ का ५२ वर्षीय प्रेमबहादुर सिंह र जुनीचाँदे गाउँपालिका जाजरकोटका ५६ वर्षीय हरिबहादुर शाही जुम्लाको कागचुचा लेकमा अलपत्र परेको सिंहका भाइ तिला गाउँपालिका ४ का धिरबहादुर सिंहले जानकारी दिए । हिउँ धेरै भएकाले उद्धार गर्न भन्दै बिहान फोन सम्पर्क गरेको तर त्यसपछि अवस्था थाहा नभएको उहाँले बताए । जुम्ला र डोल्पामा मङ्सिरको पहिलो दिन नै हिमपात भएको छ । बिहानैदेखि उपल्लो डोल्पा, तल्लो डोल्पा, जुम्लासहित विभिन्न ठाउँमा हिमपात भएपछि चिसो बढेको छ । जनजीवन प्रभावित भएको छ ।
