२ मंसिर, एजेन्सी ।
अमेरिकी सञ्चारमाध्यमले राष्ट्रपति डोनल्ड ट्रम्पले अफगानिस्तान र इराकबाट थप सेना फिर्ता गर्ने आदेश दिने अमेरिकी सेनाको अपेक्षा रहेको बताएका छन्।
अफगानिस्तानमा सन् २०२१ को ज्यानुअरीसम्म आधा सैनिक फिर्ता गरेर २,५०० जनामा झारिने अधिकारीहरूले बताएका छन्। त्यस्तै इराकमा ५०० सैनिक कटौती गरेर २,५०० मात्र राखिने बताइएको छ।
राष्ट्रपति ट्रम्पले यसअघि नै क्रिसमससम्म सबै सैनिकलाई घर फर्काउने चाहेको बताएका थिए। सैनिक फिर्ता ल्याउने काम ज्यानुअरी १५ सम्म सकिनुपर्ने सञ्चारमाध्यमले जनाएका छन्।
त्यो भनेको जो बाइडनले राष्ट्रपतिका रूपमा काम थाल्नुभन्दा एक दिनअघि हो। राष्ट्रपति ट्रम्पले लामो समयदेखि सेनालाई फिर्ता ल्याउनुपर्ने आह्वान गर्दै आएका छन्।
उनले अमेरिकी सैन्य हस्तक्षेप खर्चिलो र प्रभावहीन भएको बताउने गरेका छन्। एपी समाचार संस्थाले उदृत गरेका अधिकारीका अनुसार सैन्य नेतृत्वलाई सप्ताहान्तमा सेना फिर्ता गर्ने योजनाबारे बताइएको थियो।
उनीहरूले एउटा कार्यकारी आदेश तयार पारिएको बताएका छन्। सेप्टेम्बरमा पेन्टागनले इराकबाट एक साताभित्र एक तिहाइभन्दा बढी सेनालाई फिर्ता ल्याउनुपर्ने बताएको थियो।
त्यसबेला उसले ५,२०० सैनिक सङ्ख्यालाई घटाएर ३,००० बनाएको थियो। त्यसबेला मध्यपूर्वका लागि उच्च अमेरिकी कमाण्डर जनरल केनेथ म्याकेन्जीले जिहादी समूह इस्लामिक स्टेटको बाँकी रहेको अवशेष अन्त्य गर्न इराकमा रहेका अमेरिकी सेनाले इराकी सुरक्षा बललाई सल्लाह दिन र सहयोग गर्न जारी राख्ने बताएका थिए।
अमेरिकी नेतृत्वको फौजले सन् २००३ मा इराक कब्जा गरेको थियो र राष्ट्रपति सद्दाम हुसेनलाई हटाएको थियो। उक्त सेनाले आम नरसंहारकारी हतियार नष्ट गरेको बताइएको थियो तर पछि त्यस्तो हतियार अस्तित्वमा नरहेको खुलासा भएको थियो।
अफगानिस्तानमा भने सन् २००१ देखि अमेरिकी फौज रहेको छ। सन् २००१ सेप्टेम्बर ११ मा अल(कायदाद्वारा अमेरिकामा गरिएको हमलाको केही सातापश्चात् अमेरिकी नेतृत्वको संयुक्त सेनाले अफगानिस्तानबाट तालिबान सत्ता अन्त्य गरिदिएको थियो।
त्यसबेला अफगानिस्तान अल–कायदाको आधार क्षेत्र रहेको थियो। तालिबान पुनः सङ्गठित भयो र सन् २०१८ देखि देशको दुई तिहाइ भागमा सक्रिय रहेको छ।
अमेरिकाले यसै वर्षको सुरुदेखि तालिबानसँगको शान्ति सम्झौता अनुसार आफ्ना सेना फिर्ता गर्न थालेको थियो।(बीबीसी)
