२३ मंसिर, काठमाडौं ।
नेपालमा पछिल्लो चौबीस घण्टामा काेराेना संक्रमणबाट २३ जनाको मृत्यु भएको छ । योसहित हालसम्म नेपालमा कोरोना सङ्क्रमणबाट मृत्यु हुनेको संख्या १ हजार ६ सय ३७ पुगेको छ ।
त्यसो त स्वास्थ्य तथा जनसंख्या मन्त्रालयले नेपालमा केही दिनदेखि कोरोना भाइरसबाट सङ्क्रमित हुनेहरु निको हुने दर बढिरहेकाे जनाएको छ । मन्त्रालयका अनुसार नेपालमा काेराेना भाइरसबाट निको हुने दर ९४.११ प्रतिशत रहेको छ ।
पछिल्लाे चाैबीस घण्टामा एक हजार ६२१ जना सङ्क्रमितहरु निको भएका छन् । हालसम्म दुई लाख २९ हजार ५४ जना सङ्क्रमित निको भइसकेका छन् ।
पछिल्लो चौबीस घण्टामा १३८२ जना सङ्क्रमित थपिएका छन्। थपिएका सङ्क्रमितसँगै नेपालमा कुल सङ्क्रमितको संख्या दुई लाख ४३ हजार ३७७ पुगेको छ ।
पछिल्लो २४ घण्टामा ८ हजार ९४७ जनाको आरटी पीसीआर नमूनाको परीक्षण गरिएको थियो । हालसम्म १७ लाख ९९ हजार ६८६ जनाको पीसीआर परीक्षण गरिएको छ ।
नेपालमा हाल १२ हजार ६८६ जनामा भाइरसको सङ्क्रमण सक्रिय छ । संक्रमितमध्ये ५२३ जना क्वारेन्टिनमा रहेका छन ।
