५ पौष, काठमाडौं । कोरोनाको सङ्क्रमणबाट विदेशमा थप ११ जना नेपालीको ज्यान गएको छ । गैरआवासीय नेपाली संघ (एनआरएनए)का अनुसार पछिल्लो दुई हप्तामा यूएईमा मात्र थप ८ जना नेपालीको ज्यान गएको छ ।
गैरआवासीय नेपाली संघ अन्तर्गतको स्वास्थ्य समितिका अनुसार हालसम्म विदेशमा ५२ हजार १ सय ५७ जना नेपालीमा कोरोनाको संक्रमण देखिएको छ । ती मध्ये ४९ देशका ४९ हजार १ सय १० जना नेपालीमा कोरोना सङ्क्रमणबाट मुक्त भएका छन् ।
यो कुल सङ्क्रमितको ९४ प्रतिशत रहेको हो । शनिबार साँझसम्म विश्वका विभिन्न २१ देशमा रहेका ३ सय १२ जनाको कोरोना सङ्क्रमणका कारणले ज्यान गएको स्वास्थ्य समितिका संयोजक डा. सञ्जिव सापकोटाले जानकारी दिए ।
सापकोटाका अनुसार यो हप्ता मलेसिया, भारत, कतार, यूएई, नाइजेरिया, दक्षिण अफ्रिका, क्यानाडा, अष्ट्रिया, जापान र दक्षिण कोरियामा रहेका नेपालीहरुमा थप कोरोना सङ्क्रमण देखिएको छ ।
