११ पुष, काठमाडौं । सत्तारुढ नेकपाका नेताहरु बीच अहिले पानी बाराबारको स्थिती देखिएको छ।
अर्काे पक्षलाई तल पार्न हदै सम्म तल झर्न सक्ने आफनो क्षमता देशको नेतृत्व गरिसकेका नेकपाका नेताहरुले देखाईरहेका छन । नेताका बोली र ब्यहारले उनीहरुको चरित्र उदाङगो भईरहेको छ । नेकपा वैचारिक र राजनीतिक संगठनात्मक रुपमा विभाजन भएसँगै त्यसका प्रमुख नेताहरु एकअर्कालाई तल्लो स्तरमा उत्रिएर गाली गर्न थालेका छन् । प्रधानमन्त्री समेत रहेका केपी शर्मा ओली र पुष्पकमल दाहाल प्रचण्ड–माधव कुमार नेपाल समूहका नेताहरु एकले अर्कोलाई व्यक्तिगत गाली गर्ने स्तरमा पुगेका छन् । हिजोसम्म सँगै रहेका र कम्युनिष्ट आन्दोलनलाई पूर्णता दिनेभन्दै साढे दुई वर्षअघि मात्र एकता गरेका नेपालका कम्युनिष्ट पार्टीका अध्यक्षहरु अहिले एकअर्कालाई संघीयता विरोधी तथा कम्युनिष्ट विरोधी करार गर्न उद्धत छन् ।
एकले अर्कोलाई फोहोरी राजनीतिक व्यक्ति पुष्टि गर्न उत्रिएका नेताहरुको बोलीले जनतालाई भने निराश र आक्रोशित बनाएको छ । कानूनी रुपमा अहिलेसम्म एकै पार्टी रहेका उनीहरुले एकले अर्कोलाई यसरी आरोप प्रत्यारोप गरिरहँदा तिनै नेताको नेतृत्वमा भोलि बन्ने अर्को पार्टीले कस्तो उत्तरदायी भूमिका निभाउँछ ? अनि त्यो पार्टी नेतृत्वमा रहने वा बन्ने सरकारबाट जनताले के आशा गर्ने ? हिजोसम्म एक रहेका नेताहरु यो स्तरमा पुगेर एकअर्कालाई गाली गर्नुको कारण पद र जुँगाको लडाई मात्र नै होइन भनेर जनतालाई कसरी विश्वस्त पार्न सक्छन ?
