१३ पौष, काठमाडौं । नेपाल वायु सेवा निगमको आन्तरिक उडान अत्यन्तै टीठलाग्दो अवस्थामा पुगेको छ ।
गन्तव्य धेरै, जहाज र आम्दानी कम हुँदा निगम अत्यन्तै टीठलाग्दो अवस्थामा पुगेको हो । निजी क्षेत्रका अन्य कम्पनीले जहाज थपेर गन्तव्य विस्तार गर्दै जाँदा सरकारी लगानी रहेको वायुसेवा निगम भने आन्तरिक उडान नै बन्द गर्ने अवस्था नजिकै पुगेको छ ।
निगमले अहिले देशका १४ वटा गन्तव्यमा उडान गर्दै आएको छ । काठमाडौंलाई आधार बनाएर निगमले भोजपुर, दाङ, ताप्लेजुङ, थामखर्क, खानीडाँडा, रुकुम र फाप्लुमा उडान गर्दै आएको छ । यस्तै नेपालगन्जलाई आधार बनाएर रुकुम, डोल्पा, जुम्ला, साँफेबगर, सिमीकोट, ताल्चा र बाजुरामा निगमले उडान गर्दै आएको छ ।
निगमले १४ वटा गन्तव्यमा उडान गर्दै आए पनि जहाज भने जम्मा २ वटा छन् । त्यो पनि ४९ वर्ष पहिलेका । सन् १९७१ अर्थात विक्रम संवत् २०२८ सालमा किनेका २ वटा ट्विनअटर जहाजमार्फत अहिले निगमले आफ्नो आन्तरिक उडान धान्दै आएको छ ।
चीनसँग किनेका र उपहारमा पाएका ६ वटा जहाज उडान नसकेर ग्राउन्डेड गरेको निगमले अहिले १९ सिटे २ वटा जहाज मात्रै उडाउँदै आएको छ । ४९ वर्ष पुराना जहाज बिग्रिएर हैरान हुने गरेको छ । एउटा जहाज बिग्रिएमा २र३ हप्ताभरिकै उडान तालिका प्रभावित हुँदै आएको निगमका एक कर्मचारीले जानकारी दिए ।
जहाज उडाउन भन्दा नउडाउँदा फाइदा
आन्तरिक जहाजमा यात्रु पनि पाइन छाडेको निगमले जनाएको छ । अहिले आन्तरिक गन्तव्यमा जहाज उडानभन्दा नउडाउँदा नै पैसा बचत हुने निगमको भनाइ छ ।
नेता र सांसदको दबाबको कारण निगमले यात्रु नहुँदा नहुँदै पनि केही दुर्गम क्षेत्रमा उडान गर्न बाध्य भएको छ । यसका कारण पनि समस्या भएको निगम स्रोतको गुनासो छ ।
