दरबार हत्याकाण्ड छानविन गर्न पूर्वराजाको आग्रह (भिडियो सहित)

१५ पुष, काठमाडौं । वि.सं २०५८ साल जेठ १९ गते नेपाल र नेपालीका लागि एउटा कालो दिन हो । जुन दिन देशका राजासहितको राजपरिवारको नरसंहार भयो । राजा बीरेन्द्रको बंशनाश भयो । नारायणहिटी राजदरबारको त्रिभुवन सदनमा वीरेन्द्रको वंश नै नाश हुने हत्याकाण्ड भयो । हत्याकाण्डपछि गठन भएको छानबिन समितिले तत्कालिन युवराज दिपेन्द्रले राजपरिवारका सदस्यहरुको हत्या गरी आफुले पनि आत्महत्या गरेको विवरण सार्वजनिक भयो । आफूले भनेकी युवतीसँग विवाह गर्न नपाएको झोँक र नसा सेवन गरेको सुरमा सबैको हत्या गरी आफूले आत्महत्या गरेको छानविन समितिको दाबी नेपाली नागरिकका लागि अझै पनि विश्वशनीय बन्न सकेको छैन । उक्त घटनाको १९ वर्ष हुँदा पनि त्यस हत्याकाण्डलाई धेरैले रहस्यमय घटनाका रूपमा हेर्ने गरेका छन । रहस्यमयी भएपनि दरबार हत्याकाण्डलाई नेपालको इतिहासमा गणतन्त्रको बलियो बीउ रोप्ने एउटा घटनाका रूपमा पनि राजनीतिक नेताहरुले चित्रण गर्ने गर्दछन । हत्याकाण्डपछि राजा बनेका ज्ञानेन्द्र शाहलाई उक्त हत्याकाण्डको दोष लगाउँदै नारा लागेको थियो र अहिलेपनि पूर्वराजा ज्ञानेन्द्रकै संलग्नता रहेको कतिपय तर्क गर्छन । अहिले आएर यस विषयमा पूर्व राजा ज्ञानेन्द्रले मुख खोलेका छन । जनताको माग बमोजिम नै ज्ञानेन्द्रले हत्याकाण्डको छानविन हुनुपर्ने बताएका छन । आफूलाई दरबार हत्याकाण्ड मच्चाएको दोष लाग्ने गरेको पूर्व राजा ज्ञानेन्द्रले समेत स्वीकार गरेका छन । उनले पूर्व राजा वीरेन्द्रको ७६ औँ जन्मदिनका दिन बुधबार ट्विट गर्दै जनप्रतिनिधिहरुलाई हत्याको छानविन गर्न भनेका छन् । उनले लेखेका छन्–प्रत्यक्ष÷परोक्ष रूपमा विभिन्न भावभङ्गीमा हाम्रो परिवारमाथि हाम्रा प्रिय दाजू र वहाँको परिवारको अन्त्यका विषयमा भनिने कुराहरूले हामीलाई निक्कै मर्माहत तुल्याउने गर्दछ । जनताको मत पाएका सत्तासिन व्यक्तिहरूलाई वहाँको हत्याको छानबिन गर्ने पूर्ण अधिकार छ । २०६२-०६३ को जनआन्दोलनमा पनि राजा ज्ञानेन्द्रलाई दरबार हत्याकाण्डको दोष लगाउँदै नारा लगाइएको थियो । छानविन समितिले दीपेन्द्रले हत्या गरेको निष्कर्ष दिएपनि दोष अझै ज्ञानेन्द्रलाई नै लाग्नुमा उनले आपत्ति जनाउँदै वास्तविक हत्याराका विषयमा छानविन गर्न चुनौती दिएका छन् । आफूमाथि नै हत्याकाण्डको दोष थोपरिएको १९ वर्षपछि छानविन गर्न ज्ञानेन्द्रले जनताको मत पाएका सत्तासीनलाई आग्रह गरेका छन । दरबार हत्याकाण्डबारे छानबिन समितिले दिएको निष्कर्ष सर्वस्वीकार्य नभएको अवस्थामा जनताको सरकारले अब हत्याको छानविन गर्छ त ?