२३ पुष, विराटनगर । वायु प्रदुषणको स्तर खतराको तह भन्दा माथि पुगेपछि देशका प्रमुख सहरहरुमा घरबाहिर ननिस्कन सरकारले अपिल गर्न थालेको छ ।
प्रदेश १ को राजधानी समेत रहेको औधोगिक नगरी विराटनगरको हावामा पनि प्रदुषण फैलिएको मात्र छैन, प्रदूषणको मात्रा खतराको तहमा छ । जुन मानव स्वास्थ्यका लागि हानिकारक छ । वायु गुणस्तर सूचकांक (एयर क्वालिटी इन्डेक्स–एक्युआई) १६० भन्दा धेरै छ । ० देखि ५० सम्म स्वास्थ्यका हिसाबले अति उत्तम गुणस्तरको हावा मानिन्छ र ५० देखि १ सयसम्मलाई सामान्य मानिन्छ । १०१ देखि १५० सम्मलाई खतराको सीमामा र १५१ देखि २०० सम्मलाई ‘रेड जोन’ मानिन्छ । विराटनगरमा १ सय ६० को आसपास एक्युआई देखाउनुले पुष्टि गर्छ कि विराटनगरमा मानव स्वास्थ्य प्रतिकुल गुणस्तरको हावा छ । यसले स्वास्थ्य समस्या निम्त्याउने भएकाले विराटनगर महानगरपालिकाले अत्यावश्यक कामबाहेक घर बाहिर ननिस्कन अपिल गरेको छ । औद्योगिक सहर विराटनगरमा निर्माण कार्यबाट निस्कने धूलो, सवारी चाप, चिसो बढ्नु जस्ता कारणले धुवाँ धुलो फैलिएको हो । काठमाडौंमा प्रदुषणका कारण आँखा पोल्ने समस्या देखिन थालेको छ । प्रदूषित वायुका कारणले स्वासप्रश्वाससम्बन्धि समस्या सहित अरु रोगको समेत संक्रमण हुन सक्ने स्वास्थ्यविद्हरुको भनाइ छ । जाडो समयमा बढेको वायु प्रदूषणले गर्दा धुलो धुवाँका कणहरु टाँसिएर मुख र नाकबाट छिर्ने गर्छन । यसले श्वासनलीमा एलर्जी गराउने चिकित्सक बताउँछन । कोभिड १९ पनि श्वासप्रश्वासजन्य भाइरस भएकाले कोरोना संक्रमणको जोखिम पनि उच्च हुन्छ । स्वास्थ्यविद्हरुका अनुसार, इन्फ्लुएन्जा, राइनो, एडिनो, रेस्पिरेटरि सेन्सियल (आरएसभी) लगायत भाइरस यस्तो प्रदुषणमा फैलने संभावना बढि हुन्छ । एलर्जी र निमोनियाका साथै जटिल प्रकारको स्वासप्रश्वासजन्य समस्यासमेत गराउने सम्भावना हुन्छ । विराटनगर महानगरपालिकाले प्रदूषण उच्च तहमा पुगेकाले मर्निङवाक गर्नेलाई पनि घरबाहिर ननिस्कन अनुरोध गरेको छ । महानगरपालिकाले फोहर डढाउने र विकास निर्माणको काम पनि रोक्न नगरवासीमा अनुरोध गरेको छ ।
