१० फागुन, एजेन्सी ।
इरानले संयुक्त राष्ट्रसङ्घका अनुगमनकर्ताहरुलाई आफ्नो परमाणु केन्द्रमा अनुगमनका लागि थप तीन महिना पहुँच दिने भएको छ ।
संयुक्त राष्ट्रसङ्घका अनुसार इरान राष्ट्रसङ्घीय अनुगमन निकायका अधिकारीहरुलाई थप तीन महिना परमाणु केन्द्रहरुमा निगरानीका लागि स्वीकृति दिने भएको हो ।
तर हतारमा गरिएको यो सम्झौताले इन्टरनेशनल एटोमिक इनर्जी एजेन्सी (आईएईए) का निरीक्षणकर्तालाई अब अनुगमनको कम मात्र पहुँच हुनेछ ।
उनीहरूले आकस्मिक निरीक्षण गर्न पनि नपाउने बीबीसीले जनाएको छ । इरानले भोलिदेखि निरीक्षणकर्तालाई दिइने पहुँचसम्बन्धी नीतिलाई परिवर्तन गर्दैछ ।
सन् २०१५ मा भएको एउटा परमाणुसम्बन्धी सम्झौताबाट अमेरिका पछि हटेर तत्कालीन राष्ट्रपति डोनाल्ड ट्रम्पले लगाएका प्रतिबन्धहरू अमेरिकाले नहटाएकाले इरानले यो कदम चालेको हो ।
आईएईएसँगको सम्झौतापछि अब तेहरान र वाशिङ्गटनलाई सम्झौतामा पुग्न थप समय प्राप्त भएको छ । ट्रम्प प्रशासनले इरानमाथि पुनः प्रतिबन्धहरू लगाएपछि इरानले सन् २०१५ मा ६ वटा विश्व शक्तिसँग गरेको सम्झौताअनुसार रोकेको उसको परमाणु कार्यक्रम फेरि सुरु गरेको थियो ।
