१० असार, काठमाडौं ।
नेकपा माओवादी केन्द्रका अध्यक्ष पुष्पकमल दाहाल प्रचण्डले संविधानको रक्षा गर्दै संविधानको समयानुकूल परिमार्जन गर्ने उद्देश्यको जगमा पाँच दलीय गठबन्धन सम्भव भएको बताएका छन् ।
बिहीवार विपक्षी गठबन्धनले आयोजना गरेको सम्पादकहरूसँगको छलफलमा बोल्दै अध्यक्ष प्रचण्डले विपक्षी दलहरूबीचको गठबन्धन सैद्धान्तिक, व्यावहारिक, राजनीतिक र राष्ट्रिय भावनाको आधारलाई समेटेर बनाइएकाले लामो समयसम्म सँगसँगै जान सक्ने बताए । उनले संविधानको रक्षा गर्दै समयानुकूल परिमार्जन गर्दै लैजाने उद्देश्यमा केन्द्रित रहेर गठबन्धन बनेको बताए ।
अहिलेको सङ्घर्ष प्रधानमन्त्री कसलाई बनाउने भन्ने नभइ राष्ट्रको हितको पक्षमा उभिने र नउभिनेबीचको रहेको उनले बताए । अध्यक्ष प्रचण्डले २०४६ साल र २०६२÷०६३ सालमा लोकतन्त्रवादी र वामपन्थीको मिलेमतोमा आन्दोलन सफल भएको उल्लेख गर्दै अहिले पनि केपी ओलीको निरङ्कुशताले लोकतन्त्रवादी र वामपन्थीलाई एकै ठाउँमा ल्याइ पु¥याएकाले आन्दोलन सफल हुने बताए ।
उनले भने, ‘सैद्धान्तिक, व्यावहारिक, राजनीतिक र राष्ट्रिय भावनाको आधारलाई पनि समेटेर जानुपर्छ भन्ने निष्कर्षसहित गठबन्धन अगाडि गएको छ । यो गठबन्धन कुनै अवसरवादी गठबन्धन होइन ।प्रधानमन्त्रीका निम्ति भएको सङ्घर्ष पनि होइन । यो संविधान, लोकतन्त्र र राष्ट्रको हितको पक्षमा उभिने र नउभिने बीचको लडाइँ हो । सिस्टम बचाउने वा नबचाउने भन्ने बीचको लडाइँ हो ।’
अध्यक्ष प्रचण्डले सर्वोच्च अदालतमा आफूहरूको कुनै शेटिङ नभएको बताए । मन्त्री नियुक्ति बदर गर्ने सर्वोच्चको फैसलाअघि आफूले बोलेको कुरालाई शेटिङ भन्दै टिप्पणी गरिएको भन्दै उनले आफूहरू शेटिङ गरेर शासन गर्नेवाला नभएको स्पष्ट पारे ।
