१५ असार, काठमाडौँ ।
जारी १६औं संस्करणको युरोकप फुटबलमा नकआउट चरणको अन्तिम दिन आज दुई खेल हुँदैछ ।
नकआउट चरण अन्तर्गत मंगलबार हुने पहिलो खेलमा इंल्याण्ड र जर्मनी भिड्दै छन् । इंल्याण्डको वेम्बली स्टेडियममा हुने इंल्याण्ड र जर्मनी बीचको खेल नेपाली समयानुसार राति ९ः४५ बजे सुरु हुनेछ । दुबै टिम जित निकाल्दै अन्तिम आठमा पुग्न चाहन्छ ।
इंल्याण्डले समूह चरणमा उत्कृष्ट प्रदर्शन गरेको थियो । युवा खेलाडी रहेको इंल्याण्ड समूह ‘डी’को विजेता बन्दै अन्तिम १६ मा पुगेको हो । ३ खेलमा ७ अंक जोडेको थियो ।
समूह चरणको पहिलो खेलमा इंल्याण्डले क्रोएसियालाई १–० ले पराजित गरेको थियो । दोस्रो खेलमा पनि इंल्याण्डले स्कटल्याण्डसँग गोलरहित बराबरी खेलेको थियो । अन्तिम खेलमा चेक रिपब्लिकलाई १–० गोल अन्तरले पराजित गर्दै इंल्याण्ड समूह विजेता बनेको हो ।
यता, जर्मनी पनि बलियो टिम मानिन्छ । समूह चरणमा जर्मनीले ठुला देशसँग राम्रो प्रर्दशन गरेको थियो । जर्मनीले ३ खेलमा ४ अंक जोडेको थियो । समूह चरणको पहिलो खेलमा जर्मनी फ्रान्ससँग १–० ले पराजित भएको थियो । जर्मनीले दोस्रो खेलमा पोर्चुगललाई ४–२ ले पराजित गर्यो । तेस्रो खेलमा जर्मनीले हंगेरीसँग २–२ को बराबरी खेलेको थियो ।
युवा खेलाडीको बाहुल्यता रहेको दुवै टिम अहिलेसम्म ३२ पटक आमुनेसामुने भएका छन् । जसमा जर्मनी १५ पटक विजयी भएको थियो भने इंल्याण्ड १३ पटक विजयी भएको थियो । ४ खेल बराबरीमा रोकिएको थियो ।
