७ भदौ, काठमाडौं ।
प्रमुख विपक्षी दल नेकपा एमालेका नेता केपी शर्मा ओलीले सभामुखविरुद्ध धम्कीपूर्ण अभिव्यक्ति दिएको भन्दै सत्तारुढ गठबन्धनले आपत्ति जनाएको छ ।
सोमबार नेपाली कांग्रेसका सचेतक पुष्पा भुसाल, माओवादी केन्द्रका प्रमुख सचेतक देव गुरुङ, जसपाका प्रदीप यादव, राष्ट्रिय जनमोर्चाकी दुर्गा पौडेल र नेकपा एकीकृत समाजवादीका जीवनराम श्रेष्ठले संयुक्त वक्तव्य जारी गर्दै सभामुखविरुद्ध धम्कीपूर्ण अभिव्यक्ति दिएको भन्दै आपत्ति जनाएका हुुन् ।
सभामुख व्यवस्थापिकाको प्रमुखका साथै संघीय संसदको संरक्षक भएको उनीहरुले बताइका छन् । उनीहरुले भनेका छन्, ‘सभामुखका विरुद्ध धम्कीपूर्ण अभिव्यक्तिहरु वर्तमान संवैधानिक व्यवस्था र लोकतान्त्रिक प्रणालीविरुद्ध हुन् ।’
उनीहरुले विपक्षी दलका नेता ओलीलाई संवैधानिक मर्यादा अवलम्बन गर्न समेत आग्रह गरेका छन् ।
अध्यक्ष ओलीले एमालेले कारबाही गरेका माधवकुमार नेपालसहित १४ सांसदलाई पदमुक्त नगरेकोमा सभामुखप्रति आक्रोश पाेख्दे आएका छन् ।
