३ असोज, काठमाडौं ।
नेकपा एमाले अध्यक्ष केपी शमा ओलीले संविधानमा मतभेद रहेको बताउने मधेशकेन्द्रित दलहरुलाई मन्त्री बन्दा लिने शपथको भाषा सम्झाएका छन्। पद हासिल गर्दा ‘नेपालको संविधानप्रति पूर्ण बफादार रही सत्य र निष्ठापूर्वक …’ भनेर लिइएको शपथ ओलीले सम्झाएका हुन्।
अहिले विरोध गरिरहेकाहरु यो संविधान आएपछि बनेका सरकारमा मन्त्री बनेको उल्लेख गर्दै उनले भने, ‘अझै मतभेद छ भन्नु मौकापरस्त ढंगले धोका दिने काम हो, नतालाई धोका दिने काम मात्रै हो। ‘नेपालको संविधानप्रति पूर्ण बफादार रही सत्य र निष्ठापूर्वक …’ भनेर उनीहरुले शपथ लिइसकेका छन्।’
कतिपयले त आफ्नै भाषामा शपथ खाएको समेत उनको टिप्पणी छ। आसपासका जनताले पनि बुझुन् भनेरै होला आ–आफ्नो भाषामा शपथ खाने लहरै चल्यो। लाभका लागि शपथ खान, अनि मतभेद छ भन्ने दोहोरो भएन र?’
दोस्रो संशोधनका क्रममा कालापानी, लिम्पियाधुरा र लिपुलेक राखेर निशानछापमा राख्दा सर्वसहमति भएको उनको भनाइ छ। ‘अब ठूला मतभिन्नता बाँकी छैनन्। आधारभूत प्रस्तावना र मूल्यमान्यता सही छन् भन्ने सर्वस्वीकार्य बनेका छन्।’
