८ असोज, काठमाडौं ।
प्रधानन्यायाधीश बिनाको संवैधानिक इजलास गठन हुन सक्छ कि सक्दैन भन्ने मुद्दाको सम्भवतः आज टुंगो लाग्ने भएको छ ।
संवैधानिक परिषदले गरेका संवैधानिक नियुक्तिविरुद्धको रिटमाथिको सुनुवाइमा प्रधानन्यायाधीश बस्न नमिल्नेविरुद्धको रिटमाथिको सुनुवाइका लागि आज पेसी तोकिएको छ ।
प्रधानन्यायाधीशले सो मुद्दाको सुरु र फैसलाको दिन आफू नबस्ने भनेको भन्दै उक्त निर्णय संविधानविपरित भएको दाबीसहित अधिवक्ता गणेश रेग्मीले सर्वोच्च अदालतमा रिट दर्ता गराएका थिए ।
न्यायाधीशद्वय प्रकाशकुमार ढुंगाना र मनोजकुमार शर्माको इजलासमा उक्त मुद्दा सुनुवाइ हुने भएको हो । न्यायाधीश हरि फुँयालको एकल इजलासले यसबारेमा लिखित जवाफ प्राप्त भएको ३ दिनपछि पेसी तोक्न दिएको आदेश बमोजिम आज पेसी तोकिएको हो ।
सर्वोच्च अदालतले भने लिखित जवाफमा संविधान बमोजिम प्रधान न्यायाधीशबिनाको संवैधानिक इजलास गठन हुन नसक्ने जवाफ पेस गरेको छ । प्रधानन्यायाधीशबिनाको संवैधानिक इजलास बस्ने कि नबस्ने भन्ने मुद्दाको टुंगो लागेपछिमात्र संवैधानिक नियुक्तिहरुविरुद्धको रिटमाथि सुनुवाइ अघि बढ्ने जनाइएको छ ।
