१८ असोज, काठमाडौं।
नेकपा माओवादीका महासचिव नेत्र विक्रम चन्द ‘विप्लव’ ले सरकारसँगको तीन बुँदे सहमति यथाशीघ्र कार्यान्वयन गर्न माग गरेका छन् । तीन बुँदे कार्यान्वयनका लागि पटक–पटक सरकारको ध्यानाकर्षण गर्दा पनि माग पूरा नभएपछि विप्लवले पुनः सरकारको ध्यानाकर्षण गराएका हुन् ।
साेमबार पार्टी प्रवक्ता खड्कबहादुर विश्वकर्मा ‘प्रकाण्ड’ ले प्रधानमन्त्रीलाई ज्ञापनपत्र बुझाउँदै विशेष कार्यदल गठन गरेर सहमति कार्यान्वयन गर्न माग गरेका छन् ।
सहमति कार्यान्वयनको शुरुमै बन्दीको रिहाइ र मुद्दा खारेजी हुनुपर्ने उल्लेख भएपनि यहि विषयमा ढिलासुस्ती भएको विप्लवको गुनासो छ । सरकारसँग भएको यो सहमति राजनीतिक मुद्दा भएको बताउँदै ज्ञापनपत्रमा भनिएको छ, ‘विषयको गम्भीरता र संवेदनशीलतालाई दृष्टिगत गरी बन्दी रिहा र मुद्दा खारेज गर्नका निम्ति एक विशेष कार्यदल बनाएर कार्य सम्पादन गरी विषयको छिटोभन्दा छिटो निरुपणको अपेक्षा गर्दछौं ।’
केपी ओली सरकारले आफ्नै पालामा गरेको सहमति पाँच महिनासम्म पनि कार्यान्वयन नगर्नु नेपाली राजनीतिक आन्दोलन र नेपाली जनताका निम्ति धोका भएको जनाइएकाे छ । सहमति कार्यान्वयन नभए त्यसले जटिल परिस्थितिको सिर्जना गर्ने पनि ज्ञापनपत्रमा उल्लेख छ ।
गत चैत्र २१ गते ओली नेतृत्वको सरकार र विप्लव नेतृत्वको नेपाल कम्युनिष्ट पार्टीबीच तीन बुँदे सहमति भएको थियो । सहमती कार्यान्वयन नभएकाे भन्दै विप्लवले गुनासाे गर्दै आएका छन् ।
