२४ असोज, काठमाडौं ।
नेकपा एमालेका महासचिव ईश्वर पोखरेलले अदालतले अदालत जस्तो हुनुपर्ने भन्दै राजनीतिक गर्न नहुने बताएका छन्।
आइतबार बिहान विभिन्न सञ्चारमाध्यममा आबद्ध पत्रकारहरुसँग दशैं, तिहार र छठको शुभकामना आदान प्रदान कार्यक्रममा उनले यस्तो बताएका हुन्।
‘अदालत सम्मानित ठाउँ हो तर अहिले त्यहाँ के के मञ्चन भइरहेको त्यो सबैले देखेका छौं, ’उनले भने, ‘अदालतले अदालत जस्तो हुनुपर्छ। राजनीति गर्ने होइन।’ संविधान अनुसार र राजनीतिक दल सम्बन्धी हेक्का राखेर अदालत चल्नुपर्ने पोखरेलको भनाइ छ।
उनले अहिले मुलुक अलमलमा परेको अवस्था रहेको भन्दै ताजा जनादेशमा जानु नै उपयुक्त विकल्प हुने बताए। ‘अहिलेको जस्तो अलमलले अघि बढ्दैन भनेर नै संसद विघटन गरिएको हो।
ताजा जनादेशमा जानु नै मुलुकको हितमा छ,’ उनले भने, ‘जति धेरै गन्जागोल हुन्छ मुलुकले दुःख पाउँछ जति छिटो ताजा जनादेशमै जानुपर्छ।’
नेतृत्वको विषयमा नेकपा एमालेका सबै नेताहरु जिम्मेवारी निर्वाह गर्न तयार रहेको भन्दै उनले आफूले परिस्थिति,आवश्यकता र देशभरका नेता कार्यकर्ताको मागअनुसार अघि बढ्ने बताए।
‘म आफै पनि जुनसुकै जिम्मेवारी निर्वाह गर्न सक्छु। केपी ओलीले नेतृत्व गरेको पोल अहिले बलियो हुनु जरुरी छ,’ उनले भने, ‘म तेस्रो पटक महासचिव हुँदिन विधानले पनि दिदैन र व्यक्तिगत इच्छा पनि छैन।’
महासचिव पोखरेलले निर्वाचनको घोषणा पत्रमा प्रतिबद्धता र सरकार गठन भइसकेपछि नीति तथा कार्यक्रमको वस्तुनिष्ठ समिक्षा गरिदिन सञ्चारकर्मीहरुलाई आग्रह गरे । सरकारमा नरहेको अवस्थामा जनता र जनजीविकाका कामहरु अघि बढाउन सरकारलाई दबाव दिइने बताए।
