११ चैत्र, एजेन्सी ।
फिफा विश्वकप कतार २०२२ को दक्षिण अमेरिकी छनोटमा ब्राजिलले सानदार जित निकालेको छ ।
ब्राजिलले घरेलु मैदानमा चिलीलाई ४–० ले सहजै हराएको हो । माराकाना स्टेडियम रियो दि जेनेरियोमा शुक्रबार बिहान भएको खेलमा ब्राजिलको सहज जितमा नेयमार, भिनिसियस जुनियर र फिलिपे कौटिन्होले गोल गरे । पहिलो र दोस्रो हाफमा समान दुई गोल निस्किएको थियो ।
यो जितसँगै यसै वर्ष कतारमा हुने विश्वकपमा स्थन पक्का गरिसकेको ब्राजिलको १६ खेलबाट ४२ अंक पुगेको छ । शीर्षस्थानमा रहेको अपराजित ब्राजिलले १३ जित र ३ बराबरीको नतिजा निकालेको छ । ब्राजिलसँगको हारपछि चिलीको विश्वकपमा छनोट हुने सम्भावना न्युन बनेको छ ।
चिली १७ खेलबाट १९ अंक जोडेर सातौं स्थानमा रहेको छ । यस्तै आजै विहान भएको खेलमा दुई पटकको विश्व विजेता उरुग्वेले कतार विश्वकपमा स्थान सुरक्षित गरेको छ । दक्षिण अमेरिकी छनोटको खेलमा पाहुना टोली पेरुमाथि १–० गोलको जित निकाल्दै उरुग्वेले कतार यात्रा तय गरेको हो ।
उरुग्वेको जितमा जर्जियन डी एरेस्काइटाले ४२औँ मिनेटमा गरेको गोल नै निर्णायक बन्यो । यस्तै कोलम्वियाविरुद्ध बोलिवियाले (४–०), र पाराग्वेविरुद्ध इक्वेडर (३–१)को जित निकालेको छ ।
