विराटनगर, २५ चैत । मोरङ व्यापार संघको आयोजनामा विराटनगरमा जारी रमपम ट्रेड एक्स्पोमा एक सातामै १७ करोड बढीको कारोबार भएको छ । कोरोना महामारी सुरु भएयता पहिलोपटक आयोजना गरिएको एक्स्पोमा सात दिनमै १७ करोड बढीको कारोबार भएको हो ।
गत चैत १८ देखि सुरु भएको एक्स्पोमा हालसम्म २ लाख भन्दा बढीले अवलोकन गरेको मोरङ व्यापार संघका अध्यक्ष नवीन रिजालले जानकारी दिए । ‘एक्स्पो अवलोकनमा आउनेको उत्साहजनक सहभागिताले हामी निकै उत्साहित छौँ ।’ उनले भने,‘दर्शकले मेलालाई एकदमै मन पराइदिनुभएको छ । त्यसैले उहाँहरुकै माग अनुसार पनि एक दिन समय बढाउने निर्णय गरेका छौँ ।’
एक्स्पो चैत १८ गतेदेखि २६ गतेसम्म संचालन हुने भएपनि एक दिन थप गरिएको आयोजकले जनाएको छ । उनका अनुसार एक्स्पोमा सबैभन्दा बढी इलोक्टे«निक र अटोमावाइलको सामानहरू बढी बिक्री भएको छ । एक्स्पोमा एसीसहितका ८० वटा, कुलरसहितका ६० र १०६ वटा सामान्य व्यापारिक स्टल राखिएको छ ।
एक्स्पोमा दर्शकलाई मनोरञ्जन प्रदान गर्न दैनिकजसो राष्ट्रिय कलाकारहरूबाट मनोञ्जन प्रदान गरिएको छ । शुक्रबार गायक डम्बर नेपाली र चिर्चित गायिका इन्दिरा जोशीको सांगीतिक प्रस्तुती राखिएको छ। त्यस्तै जिप लाइन, रिभर्स बन्जी र जिप साइक्लिङ लगायतका साहसिक खेलकुदको व्यवस्था पनि रहेको छ ।
एक्स्पोमा आयोजकले लण्डन ब्रिज, बुर्ज खलिफा, बुर्ज अल अरब, सेन्ट वेसिल जस्ता अन्तराष्ट्रिय संरचना राखिएका कारण हेर्न आउने दर्शकको भीड लाग्दै आएको छ । त्यस्तै सेल्फी जोनमा फोटो खिच्नेको समेत भीड देखिन्छ ।
ट्रेड एक्स्पोमा नेपालसँगै भारत, बंगलादेश र पाकिस्तानका उत्पादनहरु समेत बिक्री वितरणमा राखिएको अध्यक्ष रिजालले जानकारी दिए ।
