Nepal Times
Nepal Times
3
Shares

माओवादीको पदाधिकारीमा महिलालाई उपेक्षा

माओवादीको पदाधिकारीमा महिलालाई उपेक्षा

४ भदौ , काठमाण्डौ ।
नेकपा माओवादी केन्द्रको महासचिवमा देव गुरुङ चयन भएका छन् । शनिबार बसेको स्थायी समिति बैठकले २१ सदस्यीय पदाधिकारी टुंगो लगाएको छ । पार्टी केन्द्रीय कार्यालय पेरिसडाँडामा भएको बैठकमा अध्यक्ष पुष्पकमल दाहाल प्रचण्डले २१ जनाको पदाधिकारी राख्ने प्रस्ताव गर्दै नाम पेश गरेका थिए । गुरुङलाई उनले महासचिवमा प्रस्ताव गरेका थिए । महासचिवमा गुरुङ सर्वसम्मत चयन भएका हुन् । बैठकमा प्रचण्डले एक अध्यक्ष, एक वरिष्ठ उपाध्यक्ष, एक उपाध्यक्ष, एक महासचिव, ७ उपमहासचिव, ९ सचिव र एक कोषाध्यक्षको प्रस्ताव गरेका हुन् । गत पुसमा भएको महाधिवेशनले भने १५ जना पदाधिकारी रहने निर्णय गरेको थियो । तर नेताको व्यवस्थापनका लागि प्रचण्डले पदाधिकारी २१ सदस्यीय बनाएका छन् । प्रचण्डले प्रस्ताव गरेको पदाधिकारी स्थायी कमिटिले ताली बजाएर अनुमोदन गरेको छ ।
माओवादीको २१ पदाधिकारीको सूची यस्तो छ:
अध्यक्ष : पुष्पकमल दाहाल ‘प्रचण्ड’
वरिष्ठ उपाध्यक्ष : नारायणकाजी श्रेष्ठ
उपाध्यक्ष : कृष्णबहादुर महरा
महासचिव : देव गुरुङ
उपमहासचिव : वर्षमान पुन, पम्फा भुसाल, जनार्दन शर्मा, हरिबोल गजुरेल, गिरिराजमणि पोखरेल, शक्ति बस्नेत र मात्रिका यादव,
सचिव : दिनानाथ शर्मा, चक्रपाणि खनाल, देवेन्द्र पौडेल, लीलामणि पोखरेल, गणेश शाह, हितमान शाक्य, हितराज पाण्डे, डिलाराम आचार्य र राम कार्की
कोषाध्यक्ष :श्रीराम ढकाल

रहेका छन् ।सबैभन्दा बढी चासो रहेको महासचिवमा यसअघि वर्षमान पुन र जनार्दन शर्माको दाबी थियो । तर गुरुङ महासचिव बनेसंगै उनीहरुलाई उपमहासचिव बनाइएको छ । पुन र शर्माको सशक्त दाबेदारीका कारण महासचिव चयनमा अध्यक्ष प्रचण्डलाई सकस परिरहेको थियो । त्यही भएर प्रचण्डले तेस्रो विकल्पको रूपमा गुरुङलाई अघि सारेका छन् ।

२०३८ सालमा नेकपा मसालको केन्द्रीय सदस्य हुँदै उनी २०४० मा अखिल आठौंको केन्द्रीय अध्यक्ष बनेका गुरुङले २०४८ मा ‘एक वाम एक ठाम’ को नारा लिएर लमजुङ १ मा संयुक्त जनमोर्चाबाट चुनाव लडेका थिए । युद्धकालमा कान्छाबहादुर नाम पाएका उनी सरकारसँगको पहिलो वार्ताकालमा माओवादीबाट वार्ता टोली सदस्य पनि थिए ।

२०६५ मा कानुन तथा न्यायमन्त्री भएका गुरुङले पार्टी विभाजनमा मोहन वैद्यलाई साथ दिएका थिए । उनी अहिले माओवादीबाट प्रमुख सचेतक छन् । गत पुसमै महाधिवेशन गरे पनि पदाधिकारी चयन गर्न ८ महिना लगाएको माओवादीले पदाधिकारीमा महिलालाई भने उपेक्षा गरेको छ । २१ सदस्यीय पदाधिकारीमा एक जना पम्फा भुसाल मात्रै महिलाका रुपमा उपमहासचिवमा हटाएकी छिन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.