९ भदौ , विराटनगर ।
लियो क्लब अफ काठमाडौं रेजले यस वर्षको गाइजात्रा तथा रक्षा बन्धनको अवसरमा आयोजना गरेको गृह कला प्रतियोगिता(At Home Art Competition_)को अन्तिम नतिजा यही शनिबार सार्वजनिक गर्ने भएको छ । अन्तरपुस्ता एकता र अन्तराष्ट्रिय युवा दिवसको विषयवस्तुमा तयार पार्नुपर्ने चित्रकलाका उत्कृष्ट हुनेहरुलाई विभिन्न पुरस्कार प्रदान गरिने लियो क्लब अफ काठमाडौं रेजले जनाएको छ ।
प्रतियोगिहरुलाई आउँदा दिनहरुमा आफ्नो कलाकारितालाई अघि बढाउनका लागि प्रोत्साहन स्वरुप आफ्ना आकृतिहरु आपूर्ति गर्नका लागि प्रमुख तीन उत्कृष्ट कलाकारहरुलाई पन्ध्र सय, एक हजार र पाँच सय रुपैयाँ प्रदान गरी सबै सहभागिहरुलाई ई सर्टिफिकेट समेत प्रदान गरिने आयोजक समितिकी सदस्य रेनिशा घिमिरेले जानकारी दिएकी छिन् ।
सहभागी कलाकारहरुको चित्रकला मध्येबाट लियो डिस्ट्रिक क्लब ३२५ जीका अध्यक्ष लियो सुमित मानन्धर, सचिव लियो उराध्यन शाक्य र सहकार्य गरिरहेको दराजका एक प्रतिनिधिको निर्णायक मण्डलले उत्कृष्ट कला छनौट गरी शनिबार बेलुकी ६ बजे प्रतियोगिताको परिणाम सार्वजनिक गर्ने घिमिरेले बताएकी छिन् ।
परिणाम लियो क्लब अफ काठमाडौं रेजको आधिकारिक पेजबाट सार्वजनिक गरिनेछ । प्रतियोगितालाई प्रायोजन गरेको दराजले ५ हजारको उपहार कुपन समेत प्रदान गरेको छ ।
