Nepal Times
Nepal Times
3
Shares

राष्ट्रपति माग्न गएका नेम्वाङलाई रवि र माधवले के भने ?

राष्ट्रपति माग्न गएका नेम्वाङलाई रवि र माधवले के भने ?

१८ फागुन, काठमाण्डौ ।
राष्ट्रपति निर्वाचन नजिकिएसँगै राष्ट्रपतिका दुई उम्मेदवार यतिबेला भोट माग्न दलका ढोका ढोकामा पुगेका छन् । ८ दलीय गठबन्धनबाट उम्मेदवार बनेका रामचन्द्र पौडेललाई मत माग्न सातै प्रदेशका सांसदलाई काठमाडौंमा भेला पारेर अभिमुखीकरण दिइएको छ भने ब्यक्तिगत रुपमा पनि पौडेलले सबै मतदातालाई पत्र लेखेका छन् ।

यसअघि केही दललाई राष्ट्रपतिका लागि आफ्ना उम्मेदवार सुवास नेम्वाङलाई मतदान गर्न भन्दै पत्र लेखेको एमाले पनि आफ्नै ढंगबाट नेम्वाङका लागि मत माग्न जुटेको छ । एमाले टोलीले आज राष्ट्रिय स्वतन्त्र पार्टी र नेकपा एकीकृत समाजवादीको कार्यालय पुगेर नेम्वाङका लागि भोट मागेको छ ।

राष्ट्रिय स्वतन्त्र पार्टीका उपसभापति डोलप्रसाद अर्यालले एमालेको टोली राष्ट्रपतिका लागि भोट मागेर फर्किएको बताएका छन्। ’उहाँहरुले राष्ट्रपति चुनावमा सहयोग गर्न आग्रसहित भोट माग्नु भयो’, उनले भने, ’हामीले शुभकामना दिएर पार्टीले निर्णय गरिनसकेकाले पछि मात्रै निर्णय गर्ने जवाफ दियौँ।’ उपसभापति अर्यालका अनुसार पुस १० मा पनि एकै ठाउँ उभिएकाले अहिले पनि मिलेर जानुपर्ने आग्रह एमाले नेताहरुले गरेका थिए।

’पार्टीले निर्णय नगरिसकेकाले त्यसअगाडि हामीले शुभकामना मात्रै दियौँ’, उनले भने, ’केही दिनमै यसबारे पार्टीले ठोस निर्णय लिन्छ।’ स्वतन्त्र पार्टीका महामन्त्री मुकुल ढकालले भेटमा एमाले प्रतिनिधिले राष्ट्रपतिमा आफूलाई सहयोग गर्न आग्रह गरेको र आफूहरुले पार्टीको आन्तरिक छलफल पछि निर्णय लिने जानकारी गराएको बताएका छन् ।

महामन्त्री ढकालले पुस १० गतेको सहमति आफूहरुले मनन गरेको उल्लेख गर्दै त्यसलाई मध्यनजर गरेर बैठकमा छलफल गरी निर्णय गर्नेकुरामा आफ्नो पार्टी रहेको बताए । रास्वपासँग भोट माग्न बिहीबार दिउँसो एमालेबाट राष्ट्रपतिका उम्मेदवार सुवास नेम्वाङ राष्ट्रिय स्वतन्त्र पार्टीको कार्यालय पुगेका थिए।

नेकपा एकीकृत समाजवादीका अध्यक्ष माधवकुमार नेपाललाई भेटेपछि नेम्वाङसहित एमालेको टोली वसुन्धरा पुगेको थियो। उक्त टोलीमा एमाले उपमहासचिव पृथ्वीसुब्बा गुरुङ र सचिव योगेश भट्टराईसहित रहेका थिए। रास्वपा पुस १० मा बनेको एमाले नेतृत्वको गठबन्धनको घटक हो।

उसलाई अहिले बनेको आठ दलीय गठबन्धनमा ल्याउने कोसिस भइरहेको छ। नेकपा एमालेबाट राष्ट्रपतिका उम्मेदवार सुवासचन्द्र नेम्वाङले नेकपा (एकीकृत समजावादी) का अध्यक्ष माधवकुमार नेपालसँग भेट गरेका छन्। एमालेका उपाध्यक्षसमेत रहेका उनले राष्ट्रपतिमा आफूलाई सहयोग गर्न अध्यक्ष नेपालसँग भेट गरेका हुन्।

उनीसँगै एमाले उपाध्यक्ष विष्णुप्रसाद पौडेल, उपमहासचिव पृथ्वी सुब्बा गुरुङ, रघुवीर महासेठ र विमला राई पौड्याल थिए। नेकपा (एकीकृत समाजवादी) बाट अध्यक्ष नेपालसहित उपाध्यक्ष प्रमेश हमाल महासचिव डा. वेदुराम भुसाल, उपमहासचिव प्रकाश ज्वाला र सचिवालय सदस्य रामचन्द्र झा छलफलमा सहभागी थिए।

राष्ट्रपतिको निर्वाचन नजिकिएसँगै नेपाली कांग्रेसको तर्फबाट आठ दलको समर्थनमा उम्मेदवार रामचन्द्र पौडेल र एमालेका नेम्वाङ राष्ट्रपतिको लागि सहयोग माग्न तीव्र भेटघाटमा छन्। नेकपा (एकीकृत समाजवादी) ले भने बुधवार सचिवालय बैठकबाट राष्ट्रपतिमा कांग्रेस उम्मेदवार रामचन्द्र पौडेललाई सघाउने निर्णय गरिसकेको छ।

भेटपछि सञ्चारकर्मीहरुसँग कुरा गर्दै नेकपा (एकीकृत समाजवादी) का उपमहासचिव जगन्नथ खतिवडाले एमालेको प्रतिनिधिमण्डलले राष्ट्रपति चुनावमा एमाले उम्मेदवारलाई मतदान गर्न आग्रह गरेको बताए। उनले पार्टी अध्यक्ष नेपालले मत माग्न आएको धन्यवाद ज्ञापन गर्दै बिदा गरेको बताए।

उनले राष्ट्रपति निर्वाचनमा आफ्नो पार्टी रामचन्द्र पौडेलेको प्रस्तावक रहेको र तत्काल यसै गर्छौं भन्ने सम्भावना नरहेको उल्लेख गर्दै एक पार्टीले अर्को पार्टीको नैतिकतालाई बुझेर अघि बढेको बताए। त्यस्तै नेकपा एमालेका उपमहासचिव पृथ्वीसुब्बा गुरुङले आफूहरुले पार्टीबाट उम्मेदवार नेम्वाङलाई राष्ट्रपतिमा मतदान गर्न आग्रह गरेको र कुराकानी सकारात्मक रहेको उल्लेख गरेका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.