२४ वैशाख, काठमाण्डौ ।
काठमाडौंका विभिन्न स्थानमा मिठाई पसल सञ्चालन गरेर बसेका १० भारतीय नागरिक गलत विवरणसहितको कागजात पेश गरेर नेपाली नागरिकता लिएको आरोपमा पक्राउ परेका छन् । पक्राउ पर्नेमा भारतको उत्तर प्रदेश बलिया जिल्ला इब्राहिमपट्टी ग्राम भीमपुरा थाना बेल्थरा रोडका रहेका छन् ।
उनीहरु काठमाडौं उपत्यकाका शंखमुल, गंगबु, बसन्धुरा, लगनखेल, कलङ्कीलगायत स्थानमा मिठाई पसल सन्चालन गरेर बसिरहेका थिए । उनीहरुले सिराहा, रुपन्देही, बारा, पर्सालगायत विभिन्न जिल्लाबाट विभिन्न मितिमा नेपाली नागरिकता लिएको काठमाडौं उपत्यका अपराध अनुसन्धान कार्यालयले जनाएको छ ।
पक्राउ परेकामध्ये ६ जनाले ०६२÷६३ को जनआन्दोलनपछि तराईका जिल्लामा घुम्ति शिविर सन्चालन गरेर वितरण गरिएको बेला लिएको पाइएको छ । प्रहरीका अनुसार एकै परिवारका तीनजना पक्राउ परेका छन् । अन्य पनि नातेदार भएको प्रहरीले जनाएको छ ।
सिराहाको मिर्चैया स्थायी ठेगाना देखाएर २०६३ चैत १७ गते जन्मका आधारमा भरतप्रसाद गुप्ताले नागरिकता लिएको पाइएको छ । उनीसँग विवाह गरेपछि ज्ञानमती देवी गुप्ताले २०६८ असार ९ गते वैवाहिक अंगिकृत नागरिकता लिएकी थिइन् । यस्तै उनीहरुका छोरा राहुलले २०७० साल वैशाख २९ गते बंसजका आधारमा नेपाली नागरिकता लिएको पाइएको छ । राहुल डाक्टर पनि हुन् ।
उनीहरुले शंखमुलमा मिठाई पसल सन्चालन गर्दै आएका थिए । पक्राउ परेकामध्ये भरत गुप्ताले २०६३ फागुन ७ गते जन्मका आधारमा बाराबाट नागरिकता लिएको, उनकी श्रीमती स्नेहलता गुप्ताले २०६९ पुस ११ गते बंसजका आधारमा नागरिकता लिएको, गोपाल गुप्ताले २०६३ फागुन १८ गते रुपन्देहीबाट नागरिकता लिएको प्रहरीको दाबी छ ।
त्यस्तै, राजेश कुमार गुप्ताले बाराबाट २०६३ फागुन २८ गते र उनकी श्रीमती मिनादेवी गुप्ताले २०६९ पुस ११ गते बंशजका आधारमा नागरिकता लिएको पाइएको छ । रामप्रवेश गुप्ताले २०६३ फागुन २१ गते रुपन्देहीबाट जन्मका आधारमा, रामसुन्दर गुप्ताले २०६३ चैत १५ गते जन्मका आधारमा नेपाली नागरिकता लिएको प्रहरीले जनाएको छ ।
उनीहरुले नेपाली नागरिकता लिएपछि पनि भारतीय नागरिकता प्रयोग गरिरहेको प्रहरीले जनाएको छ ।उपत्यका अपराध अनुसन्धान कार्यालयका प्रमुख एसएसपी मनोज केसीले नेपाली नागरिकता प्राप्त गरेपछि नेपालका विभिन्न स्थानमा घर–जग्गा खरिद गरी व्यापार व्यवसायसमेत गरी बसेको बताएका छन् ।
उनले भारतीयहरुले वंशजको आधारमा नै नागरिकता दिएर नेपालका विभिन्न स्थानमा व्यापार व्यवसाय समेत गर्दै आएको भेटिएको बताए । उनले प्रहरीले एउटै प्याटनमा सबै जिल्लाका एकैसाथ अनुसन्धान गरेर सार्वजनिक गरिएको पनि बताएका छन् ।
