आज नेप्सेमा ३१ अंकको गिरावट

३० साउन, काठमाण्डौ ।
सेयर बजार परिसूचक नेप्से ३१.८० अंकले घट्दै २ हजार ४५.४४ अंकको विन्दुमा ओर्लिएको छ । अघिल्लो दिन १४ अंकले बढेको बजारमा आज दोब्बर अंकले नै घट्न पुगेको हो ।उसो त आज कारोबार रकम समेत घटेर २ अर्ब १५ करोड ७३ लाख रुपैयाँमा झरेको नेपाल स्टक एक्सचेञ्ज (नेप्से) ले जनाएको छ । अघिल्लो दिन १४ अंकले बढेको बजारमा ३ अर्ब १ करोड ८४ लाख रुपैयाँ बराबरको सेयर कारोबार भएको थियो ।

आज म्युचुअल फन्ड बाहेकका १२ वटा उपसूचक ऋणात्मक भएका छन् । सबैभन्दा बढी म्यानु एण्डो प्रो समूहको उपसूचक ४.२६ प्रतिशतले घट्न पुगेको छ भने हाइड्रोपावर समूहको उपसूचक २.३१ प्रतिशतले, फाइनान्स समूह २.२४ प्रतिशतले र होटल तथा पर्यटन समूहको उपसूचक २.१५ प्रतिशतले घटेको छ ।तर, यता आज म्युचुअल फन्डतर्फको उपसूचक भने २८.९० प्रतिशतले नै बढेको छ ।