२३ असोज, काठमाण्डौ ।
प्यालेस्टिनी लडाकु समूह हमासले इजरायलमा गरेको आक्रमणमा मारिएका १० जना नेपालीको सम्झनामा सरकारले आज राष्ट्रिय शोकको घोषणा गरेको छ। सोमबार बसेको मन्त्रिपरिषद्को बैठकले मंगलबार राष्ट्रिय शोक घोषणा गर्ने निर्णय गरेको थियो।
राष्ट्रिय शोकको दिन आज देशभरका सरकारी कार्यालयहरु र विदेशस्थित नेपाली नियोगहरुमा राष्ट्रिय झण्डा आधा झुकाइने गृह मन्त्रालयका प्रवक्ता नारायण प्रसाद भट्टराईले जानकारी दिएका छन्। मन्त्रिपरिषद्को बैठकले इजरायलमा ज्यान गुमाएका शव यथाशीघ्र स्वदेश ल्याउने निर्णय पनि गरेको थियो।
यस्तै, इजरायलमा ज्यान गुमाएकाका परिवारलाई १० लाख राहत उपलब्ध गराउने निर्णय पनि सरकारले गरेको थियो। सरकारले इजरायलमा द्वन्द्वग्रस्त तथा जोखिमपूर्ण क्षेत्रमा रहेका नेपालीहरुको उद्धार गरी इच्छुकलाई स्वदेश ल्याउने पनि निर्णय गरेको छ। नेपालीहरुलाई स्वदेश ल्याउन नेपाल वायुसेवा निगम (नेपाल एयरलाइन्स) र हिमालय एयरलाइन्सको जहाज तयारी अवस्थामा राखिएको छ।
उडानका लागि इजरायलसँग समन्वय भइरहेको र इजरायल सरकारले उडानका लागि सहमति जनाएमा तत्काल जहाज उड्ने बताइएको छ। कृषि विज्ञान विषयमा प्रयोगात्मक अध्ययन कार्यक्रम ‘सिक्दै कमाउँदै’अन्तर्गत नेपालबाट गएका विद्यार्थीहरु हमास समूहको आक्रमणमा परेका हुन्। आक्रमणमा सुदूरपश्चिम विश्वविद्यालयको कृषि संकायका १० जना विद्यार्थीहरु मारिएका हुन्।
मारिएका विद्यार्थीकै क्षेत्रमा कार्यरत विद्यार्थीको भने उद्धार सुरु गरिएको छ। सरकारले इजरायली सेनाको सहयोगमा सोमबार मात्रै केही विद्यार्थीहरुलाई उद्धार गरी सुरक्षित स्थानमा सारेको थियो। जोखिमपूर्ण ठाउँमा रहेका र नेपाल फर्किन चाहने विद्यार्थीलाई एक ठाउँ (सुरक्षित स्थान)मा जम्मा गरेर स्वदेश फर्काइने सरकारले जनाएको छ।
यता श्रम, रोजगार तथा सामाजिक सुरक्षा मन्त्रालयले २४ जना सहायक कामदारहरूलाई इजरायलमा यात्रा नगर्न अनुरोध गरेको छ। सोमबार साँझ मन्त्रालयले एक सूचना जारी गर्दै श्रम सम्झौता बमोजिम इजरायलका दीर्घकालीन स्याहार केन्द्रमा सहायक कामदारका लागि छनोट भएका २४ जनालाई यात्रा नगर्न अनुरोध गरेको हो।
भिसा समेत प्राप्त गरिसकेका कामदारहरूको उडानको समय बुधबार बिहान १ बजे तय भएको थियो। इजरायलमा शान्ति र सुव्यवस्था सामान्य भएपछि मात्रै वैदेशिक रोजगार सम्बन्धी थप कारबाही अघि बढाउन मन्त्रालयले अनुरोध गरेको छ ।
