Nepal Times
Nepal Times
3
Shares

पब्जी विश्वकपमा नेपालको ‘डीआरएस गेमिङ’

पब्जी विश्वकपमा नेपालको ‘डीआरएस गेमिङ’

१० कार्तिक, काठमाण्डौ ।
नेपाली पब्जी टिम ‘डीआरएस गेमिङ’ले पब्जी विश्वकप अर्थात् ‘पब्जी मोबाइल ग्लोबल च्याम्पियनशिप (पीएमजीसी) २०२३’ खेल्ने भएको छ । पब्जी मोबाइलले आफ्नो फेसबुक पेज ‘पब्जी मोबाइल ई–स्पोर्ट्स’मा पोस्ट गर्दै नेपाली टिम ‘डीआरएस गेमिङ’ सहित युरोप क्षेत्रको टिम ‘जी ग्लाडिएटर्स’ले पब्जी विश्वकप खेल्ने जानकारी दिएको हो ।

उक्त पोस्टमा यि दुई टिमबाट राम्रो प्रदर्शन भइरहेकाले विशेष आमन्त्रण गरिएको भनिएको छ । डीआरएस गेमिङले अब नोभेम्बर २ देखि डिसेम्बर १० सम्म चल्ने पब्जी विश्वकपमा प्रतिस्पर्धा गर्नेछ । डीआरएस गेमिङले पब्जी विश्वकपको लिग स्टेजबाट आफ्नो यात्रा सुरु गर्नेछ । यसभन्दा अघिको पब्जी विश्वकप अर्थात पीएमजीसी २०२२ मा ‘डीआरएस गेमिङ’ दोस्रो स्थानमा रहन सफल भएको थियो ।

‘डीआरएस गेमिङ’ सहितका नेपाली टिम केही समय अगाडि भएको ’पब्जी मोबाइल प्रो लिग (पीएमपीएल) साउथ एसिया च्याम्पियनशिप फल २०२३’ मा सोचे अनुरूप खेल्न नसक्दा पब्जी विश्वकपमा पुग्न असफल भएको थियो । ‘पीएमपीएल साउथ एसिया च्याम्पियनशिप फल २०२३’ को फाइनलमा डीआरएस गेमिङले १० औँ स्थानमा रहँदै प्रतियोगिताबाट बाहिरिएको थियो ।

डीआरएस गेमिङका सुविन श्रेष्ठ प्रजापती (रुल्ज), दीपेश गुरुङ (डेल्टा), साहस भण्डारी (किलर वाईटी) र समीर गुरुङ (ग्यान्टे) सम्मिलित छन् । द रियल सोल्जर्स (डीआरएस), सन् २०१८ मा मोबाइल पब्जी खेल सार्वजनिक भएलगत्तै हङकङमा बस्ने अशेष राईले आफ्नो साथी सर्कलका खेलाडीहरु जम्मा पारेर प्रतियोगिता खेल्न लाग्दा जुरेको नाम हो– डीआरएस ।

सन् २०२० को अगष्टमा डीआरएस गेमिङको नामबाट संस्था दर्ता गर्दा सहसंस्थापकका रुपमा अशेषसँगै भिक्टर पौडेल थपिए । उनी कम्पनीको सीईओको पनि भूमिकामा छन् । संगीन भट्टराई व्यवस्थापकका रुपमा सुरुदेखि नै टिमसँगै छन् ।

नेपालको पब्जीमा व्यावसायिक सुरुवात गर्ने श्रेय डीआरएसले पाएको छ । इण्डोनेसियाको जाकार्तामा सम्पन्न पब्जी मोबाइल ग्लोबल च्याम्पियनसिप (पीएमजीसी)मा नेपालको डीआरएस टिम उपविजेता बन्यो । विश्वस्तरमा यति ठूलो सफलता र लोभलाग्दो पुरस्कार राशीले धेरैको ध्यान तानेको थियो ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.