१२ मंसिर,काठमाण्डौ ।
झापाको भद्रपुरस्थित चन्द्रगढी विमानस्थलको धावनमार्गमा स्याल देखिएपछि बुद्ध एयरको जहाजले ’ओभरसुट’ गरेको छ। विमानस्थलका सूचना अधिकारी किशोर कुमार खत्रीका अनुशार सोमबार काठमाडौंबाट यात्रु बोकेर चन्द्रगढी विमानस्थलमा पुगेको बुद्ध एयरको जहाज अवतरणको समयमा धावनमार्गमा स्याल देखिएपछि ओभरसुट गरेको हो ।
उनले साझ ६ बजेर ४८ मिनेटमा काठमाडौंबाट चन्द्रगढी पुगेको जहाज अवतरण गर्ने बेला धावनमार्ग क्लियर देखिएको थिएन। ’धावनमार्ग क्लियर नदेखिएपछि टावरले जहाजलाई अवतरण नगर्न ‘मिस अप्रोच’ का लागि अनुरोध गरेको थियो,’ उनले भनेका छन्, ’धावनमार्गमा स्याल देखिएपछि साइट क्लियर गरेर सात बजे सुरक्षित जहाज अवतरण गरिएको हो।’
जहाज विमानस्थलमा अवतरणका लागि तयार रहेको बेला धावनमार्गमा एक्कासि स्याल देखिएसँगै टावरले जहाजलाई अवतरण नगर्न ‘मिस अप्रोच’का लागि अनुरोध गरेको विमानस्थलका प्रमुख इन्दुराम अधिकारीले बताएका छन् । विमानस्थलका कर्मचारीले तत्काल साइन जडित साधन लिएर स्याललाई धावनमार्गबाट खेदाएका थिए।
त्यसपछि ओभरसुट भएको जहाजले आकाशमा एक फन्को लगाएर ७ बजेर ५ मिनेटमा सुरक्षित अवतरण गरेका थिए। ओभरसुटका कारण जहाज १५ मिनेट अवतरणमा ढिला भएको जनाइएको छ। सो जहाज ७ बजेर ३८ मिनेटमा यात्रु बोकेर काठमाडौँका लागि उडेको थियो ।
’रनवेमा जङ्गली जनावर आइराख्ने समस्या छ,’ विमानस्थल प्रमुख अधिकारीले भनेका छन् ’विमानस्थल नजिकै चिया बगान र सानो खोल्सा रहेको त्यहीबाट बेला–बेला एउटा स्याल रनवेमा आउँछ।’ एउटा स्यालले साह्रै समस्या निम्ताइरहेको बताउँदै उनले भने, ’त्यो स्याललाई यहाँबाट हटाउन आवश्यक कदम चाल्नुपर्ने पर्ने भएको छ।’
यो विमानस्थलमा अवतरण गर्न लागेका जहाजहरूसँग रनवेमा चराचुरुंगीसँग ठोक्किएका घटनाहरू घटिरहेका छन्।
